raajat amerlanerit
Karl-Kristian Krusep biologit ataqqiniarpai
Raajanik pisassiissutit amerlineqassapput, kisianni aamma biologit siunnersuutaat malineqassapput, aalisarnermut naalakkersuisoq ilisimatitsivoq
Pinngortitaleriffiup nunatta imartaani raajaqarnerulerneranut ilimasuutaat aalisarnermut aamma nunatta karsianut nutaarsiassatsialaavoq.
Maannakkulli pisassiissutit qanoq amerlitigissanersut isumaqatigiissutigineqassapput.
Atuaruk: Biologit raajarniarnermi isumallualersitsipput
Aalisarnermut naalakkersuisoq Karl-Kristian Kruse (S), biologit siunnersuutaat qaangerlugu aappaagumut raajanik pisassiiniarani ullumikkut nalunaaruteqarpoq.
- Biologit siunnersuutaat sipporlugit pisassiinissamut tunngavissaqanngilanga. Kisianni qaffaaneq 90.000 tons ataakkaluarpaguluunniit, isumaqarpunga suli sunniuteqarluarsinnaassasut, aalisarnermut naalakkersuisoq Radioaviisimut oqarpoq.
KNR-imi atuaruk: Biologit innersuussutaat sipporneqassanngillat
- Qularutiginngilara 73.000 tonsinik pisassiisimanerput massakkut annertunerusunik tunngavissaqarluta qummut qaffaanissarput avaqqunneqarsinnaassanngitsoq, aalisarnermut naalakkersuisoq Karl-Kristian Kruse KNR-imut oqarpoq.
Raajat suli amerlanerusut
Pinngortitaleriffiup aappaagumut raajat 90.000 tonsit pisassiissutigineqassasut siunnersuutigaa, tamannalu 30.000 tonsinik ukiup siulianit 60.000 tonsiusunit annertuneruvoq.
Sulisitsisunit siornatigut oqariartuutigineqarpoq, raajartassiissutit ukiup siulianinngaanniit 12,5 procent qaangerlugu pisassiisoqartassanngitsoq kissaatiginerullugu, taamaaliornikkut aalisarnermik iliuusissatut siunnersuut unioqqutinneqassammat aamma MSC meqqiliineq ulorianartorsiortissinnaammagu.
Atuaruk: GE-p raajarniarneq suli mianernartoqartippaa
Aalisartut piniartullu kattuffiannit KNAPK-mit oqariartuutigineqartoq killormoortuaniippoq, taakkumi raajartassat qaffangaatsiarnissaat kissaatigaat.
MSC-meqqi innarlerusunngikkaa
Naalakkersuisut aningaasanut inatsisissatut siunnersuummi 130 millionit koruuninik raajartassanit aappagumut aningaasanik naatsoorsuuteqarput. Tamannalu maanna pisassat qaffanneqarnerisigut qaffanneqarsinnaalerpoq.
Krusep KNR-imut oqaatigaa, ukiumut raajartassast MSC-mik nalunaaqutsiineq ulorianartorsiortinngikkaluarlugu qaffanneqarsinnaalilermata.
Atuaruk: Biologit raajarniarnermi isumallualersitsipput