apersuineq
Karl Kristian Kruse: Suna tamarmi taartuinnaanngilaq
Aalisarnermut inatsissap siunissaa uani sapaatip akunnerani aalajangiiffigineqassaq. Naalakkersuisunut ilaasortap Karl Kristian Krusep siunnersuunni illersorpaa. Inuiaqatigiit annaasaqarsinnaanerannik oqalunneq ernumalissutiginngilaa.
Aviisimi AG-mi uani sapaatip-akunnerani Karl Kristian Kruse annertuumik apersorneqarluni apeqqarissaarfigineqarpoq.
Ilisimasallit naliliineri
Millionilikkaanik pingasunik kisitsisitalinnik inuiaqatigiinnut naleqartussaasoq ilisimasalippassuit oqaatiginnereersut, aalisarnermut piniarnermut naalakkersuisup inatsisissatut siunnersuut sooq taperernerlugu nassuiaavoq.
Inuiaqatigiinnimi aningaasatigut annaasaqataanissaanik atorfillit naliliinerat isummannut sunniuteqarpa?
- Inatsisissatut siunnersuummik suliaqarnermi inatsisissaq tamaat isiginagu aningaasatigut taakkua kingunissaanut samminerusumik taamaallaat eqqartuisoqarnera uggornarnikuuvoq suliap taassuma naammassiniarnerani. . Inuiaqatigiinnut suliffissaqarnikkut aammalu aalisagartassat inuiaqatigiit pigisaasa siamasinnerusumik aaqqissuuteqqinneqarneranik inatsisissaq imaqarpoq. Aap, eqqorneqassaagut kisianni aamma illuatungaani annertuutigut ajunngitsortaasa samminnginneqarnerat uggornarpoq, Karl Kristian Kruse akissuteqarpoq.
''Ajoqutissartai ukkatarineqartut uggornartoq''
Kisianni aamma atorfilittassi eqqaavaat inuiaqatigiit aningaasatigut annaasaqaatigisinnaagaat.
- Tassa soorunami siumoortumik annaasaqarsinnaanermik naatsorsuuteqarneq inuiaqatigiinnut apuunneqanngippat aamma tusarniaarnermi akuutinneqanngippat taava inatsissap atuutilereernerata kingorna inuiaqatigiit naatsorsuutiginngisamik eqqorneqarsinnaanerat mianersornartortaqarpoq. Kisianni illuatungaatigut sinerissap qanittuani aalisartut aammalu aalisartut amerlineqarnerata malitsigisaanik aalisartut nutaat inuttat nutaat aamma tulaassuinermi suliffiit nutaat atulerpata kommunet akileraarutitigut iluanaarutissaat aamma malitsigisaannik nunatta akileraarutinik iluanaarutissai soorunami siumoortumik oqaatigiuminaapput. Kisianni aamma iluaqutissartaqarpoq nunatta iluani. Kisianni nunatta avammut niuernerani eqqorneqartutut isigineqarsinnaasut ukiut amerlasuut aallaavigalugit taakku aningaasat taakkartorneqarput ukiumut ataatsimuunngitsoq. Kisianni katikkaanni annertusinnaanera qiteralugu oqallittoqarnera tupinnanngilaq, Karl Kristian Kruse isumaqarpoq.
AG-p ''Sapaatip-akunnerani apeqqarissaarfiani'' Karl Kristian Krusep apeqquterpassuarnut akissutai atuakkit, taanna uani ataani linki atorlugu pisiaralugu digitalimik atuarsinnaavat.