Karl Kristian Kruse aningaasaqarnermut ataatsimiititaliami siulittaasunngorpoq
Doris J. Jensen kultooreqarnermut, ilinniartitaanermut, ilisimatusarnermut ilageeqarnermullu ataatsimiititaliami siulittaasunngorpoq. Partii Naleraq inatsisartut siulittaasoqarfianiikkunnaarluni politikkikkut sunniisinnaanerulissaaq.
Karl Kristian Kruse (S) aningaasaqarnermut akileraartarnermullu ataatsimiititaliami siulittaasut ingissinnaanngorpoq. Ataatsimiititaliami siulittaasuugaluartoq, Hermann Berthelsen (S) napparsimalluni sulinngiffeqartariaqalermat taamaasilluni taarserpaa. Hermann Berthelsen ataatsimiititaliami suli ilaasortaavoq, sulinngiffeqarnerminili sinnissuminit Laura Táunâjimmit taarserneqarallassalluni.
Aqqaluaq B. Egedep (IA) Sara Olsvig ataatsimiititaliami siulittaasup tulliattut issiasimagaluartoq taarserpaa.
Partii Naleqqap aningaasanut inatsimmut mittarfiliortiternissamullu pilersaarutinut tunngasunik ataatsimiititaliami suliaqarfiit peqataaffiginagit naammagisimaarsimanngilaa. Taamaammat Hans Enoksenip Inatsisartuni siulittaasoqarfimmi inissisimaffia Inuit Ataqatigiinnut ippassaq tunniuppaat. Taamaasiornikkut ataatsimiititaliani amerlanerni ilaasortaatitaqarlerput, ilaatigut Jens Napaattooq aningaasaqarnemut ataatsimiititaliami ilaasortaatitarilerlugu.
Taarseraannerup kingunerisaanik Suleqatigiissitsisuni ilaasortaasoq Tillie Martinussen ataatsimiititaliami ilaasortaajunnaarpoq, sinniisutulli inissisimalerluni. Taarsiullugu IA-p inuussutissarsiornermut aatsitassarsiornermullu ataatsimiititaliami issiavigisimasaa Tilliep ingiffigisinnaanngorpaa.
Partii Naleqqap iluani aamma paarlaattoqarpoq. Jens Napaattuummi aalisarnermut piniarnermullu ataatsimiititaliami ilaasortaaffini, Hans Enoksenimut tunniummagu, partiip siulittaasuata politikkikkut suliat uummateqarfigisani taamaasilluni suliarisinnaanngorpai.
Doris J. Jensenip Naalakkersuisunit tunuarnerata kingorna, taamatullu Inatsisartuni ilaasortatut issiaqqilernerata kingorna, Inatsisartuni ataatsimiititaliani siulittaasuuffeqalernissaa ilimanaateqareersimavoq. Taassuma kultooreqarnermut, ilinniartitaanermut, ilisimatusarnermut ilageeqarnermullu ataatsimiititaliaq siulittaasuuffigilerpaa.
Kikkut ataatsimiititaliani issialernersut ataani atuarsinnaavat – ataatsimiititaliat oktobarip tallimaani inissititersimagaluartut sanilliussassatut aamma uani atuarneqarsinnaapput.
