isiginnaartitsineq
Karius Baktusilu meeqqanit nuannarineqarluarput
Isiginnaagassiaq Karius aamma Baktus Uummannami takutinneqarpoq meeqqanit 250-nit isinnaarneqarluni
Karius Baktusilu Kalaallit Nunaanni aliikkusersueqqipput. Isiginnaagassiaq Uummannami ataasinngormat takutinneqarpoq.
Isiginnaagassiaq takutinneqareermat meeqqat isiginnaartitsisut assileqatigiumallugillu atiisa aqqi perusuppaat.
- Meeqqanik mikisoqarmat isiginnaagassiaq marlunngorlugu avinniarlugu aalajangerparput. Siulleq meeqqanut mikinerusunut naleqquttoq aappaalu angajulliunerusunut naleqqunnerulluni, Kariusiusaartoq isiginnaartitsisartoq Majbritt Bech oqarpoq.
Malinnaaqqissaartut
- Uummannami meeqqat isiginnaagassiaq isiginnaarmassuk malinnaaqqissaarrapput. Isiginnaartitsilluni taamatut isiginnaartoqarnera misigisassaavoq, Baktusiusaartoq Hans Henrik Poulsen oqarpoq.
Nuannarineqarluartut
Isiginnaartitsisartutut ilinniarsimasut isiginnaartitsinertik nuannarilluinnarpaat.
- Meeqqat inequnarrateqaat. Ilaat tupakkaangamik angajoqqaamminukartarput. Kisianni aamma meeqqat nuannisarrattaqaat illartaqalutillu, Kariusiusaartoq oqarpoq.
Isiginnaagassiaq Aasianni takutinniarlugu isiginnaartitsisartut illoqarfimmiittut Nunatta Isiginnaartitisiarfia ilisimatitsivoq. Illoqarfiup katersortarfiani pingasunngornermi takutinneqassaaq.