Kapisillit nalunaaqutaat
Kapisillip nalunaaqutaa qangarnisaq 10.000 koruuninik nalilik
Kangaamiormiu James Larsen ukioq manna kapisilillit nalunaaqutaanik tunniussaminik nersornaaserneqarpoq
Imaassinnaavoq iikkanni nivingasuuteqartutit akisorpasunngikkaluamik.
Tamanna ukioq manna kapisillit nalunaaqutaanik tunniussisutut nersornaaserneqartup, piniartup Kangaamiormiup James Larsenip misigaa, tassa NASCO-p nersornaasiuttagaanik West Greenland Tag Return-imik, 1.500 dollarsinik (qallunaat aningaasaannik 10.150 koruuningajannik, aaqqiss.) aningaasartalimmik nersornaaserneqarami.
Pinnersaatigaat
1980-ikkunni taassuma Kangaamiut eqqaanni eqaluk nalunaaqutalik pisarisimavaa. Kingornalu angerlarsimaffimmi pinnersaatitut nivinngarsimallugu.
– Nalusimavara kapisillip nalunaaqutaa sussanerlugu, alapernaarsuutigisimanagulu, 50-inik ukiulik James Larsen Aalisarnermut Naalakkersuisoqarfimmit tusagassiorfinnut nalunaarut naapertorlugu oqaluttuarpoq.
Siorna Aasiammiu Susanne Petersen Thorin kapisillit nalunaaqutaanik tunniussigami 1.500 dollarsinik akissarsisinneqarpoq. Taamanikkullum James Larsenip nulia oqarsimavoq kapisillit nalunaaqutaat aningaasanik naleqartoq.
– Nuliama ukioq manna kajumissaarsimanngitsuuppata taanna Pinngortitaleriffimmut nassiuteqqullugu, taava taanna suli pinnersaatitut nivingatissagaluarparput, James Larsen oqarpoq.
Pisoqalineq ajorput
Kapisillit nalunaaqutaannik tunniussinissamut NASCO piffissaqartitsinngilaq, tamannalu takuneqarsinnaavoq ukioq manna kapisillit nalunaaqutaa James Larsenip tunniussimasaa, nalunaaqutaq taanna 1984-imi USA-mi kuukksuarmi Pinobscot-imi ikkunneqartuusimammat.