Kapisilinnut malittarisassat sakkortusinerat akerlilerpaa
Aalisakkanik tunisassiorfinnut kapisilinnik tunisinissamik inerteqquteqarnerata ilumoortuusinnaanera KNAPK-p takussutissaqartinngilaa
Aalisartut piniartullu kattuffiata tikkuarpaa inuussutissarsiutigalugu aalisartut ukiorpassuarni pisatik aalisakkanik tunisassiorfinnut tunisarsinnaasimagaat. Tamannali maanna unitsinneqarpoq, malittarisassat nutaat pissutigalugit.
– Naalakkersuisut pingaartinniagaasa ilagisimagaluarpaat nunap nammineq pisuussutaasa pitsaanerusumik atorneqarnissaat. Taamaattumik aalajangiineq nutaaq tupigusunnarpoq, KNAPK-mi pisortap tullia Tønnes Berthelsen erseqqissaavoq.
Tamanna peqatigalugu tikkuarpaa, aalajangiiniarnermi kattuffik peqataatinneqarsimanngitsoq.
Malittarisassat sakkortusineqarnerisa kingorna inuussutissarsiutigalugu aalisartut pisatik taamaallaat kalaalimineerniarfimmi, napparsimmavinnut, utoqqaat illuinut il.il. tuniniarsinnaavaat.
Kujataani ajornersaavoq
KNAPK-p mianersoqqussutigaa, pingaartumik Kujataani tunisassiortunuunngitsoq allanulli kapisilinnik tunitsivissaqaruminaatsitsisoqassasoq.
– Taqqavani tunisassiortut, Narsaq Seafood, APP-lu nalunaarsimapput kapisilinnik pisiortorsinnaallutik. Taamaattumillu Naalakkersuisut qinnuigissavagut piaarnerpaamik akuersissutigeqqullugu, aalisartut pisaminnik tunisassiortunut tunisisinnaanissaat, Tønnes Berthelsen erseqqissaavoq.