KANUNUPE: Naalakkersuisunit tusaaniarneqarsimanngilagut

Nunaqarfiit peqatigiiffiata KANUNUPE-p siulittaasua Jens Kristian Therkelsen oqarpoq nunaqarfinni inuuniarnermi atugassarisat aningaasaqarniarnerlu ukiuni kingullerni ajorpallaarsimasut.
Taamatut oqarpoq Sermitsiaq.AG-mut, sapaatip akunnerata uuma naanerani nunaqarfiit pillugit Ilulissani ataatsimeersuarnermik ataatsimeersuarnermik malinnaasumut. Ataatsimeersuarnermi peqataapput nuna tamakkerlugu politikerit, kommunimi politikerit, inuussutissarsiortut nunaqarfinnillu aallartitat.
– Nunaqarfippassuarni ineriartorneq unittoorsimavoq. Ilinniagaqarneq appasissuuvoq, ilinniagaqarnissamut periarfissakinneq pissutigalugu. Suliffissat amigaatigineqarput, tunitsiviit maanaannaq matusaqattaartarput sanaartornerlu uninngaannartutut oqaatigineqarsinnaavoq. 2009-mi kommunit kattunnerisa kingorna nunaqarfimmi siulersuisunut kissaatigisanik politikkikkut takorluukkanik saqqummiussinissaq ajornarnerulersimavoq. Taamaattumik inissaminiippoq erseqqissassallugu nunaqarfinni ineriartorneq ukiuni kingullermni kinguariartorsimasoq, ineriartornerlu tamanna soorunami nuanneeqaaq, Jens Kristian Therkelsen oqarpoq.
Naatsorsuutigaali Uummannap eqqaani nunaqarfimminut Ikerasammut utissalluni ilisimasassanik pisariaqartunik nassarluni, nunaqarfiit peqatigiiffiata suliaralugit ingerlateqqissinnaasaanik.
– Nunaqarfinni ajornartorsiutinik uagut ilisimannittuuvugut. Nunaqarfinni pissutsinut ataatsimut takutitsisarpugut. Ataatsimeersuarnermi nunap aqutsisui peqataapput, taamaattumik siunissaq qinigaaffiullu sinnera isumalluarfigaakka, Jens Kristian Therkelsen oqarpoq.
Ilulissani nunaqarfiit pillugit ataatsimeersuarnerup ulluani kingullermi nunaqarfiit ajornartorsiuterpassui qulaajarneqarput, ataatsimeersuarnerullu kingorna ataatsimiititaliamik pilersitsisoqarnissaa Jens Kristian Therkelsenip qilanaaraa, tassani ilaasortaatitaqassalliutik Naalakkersuisut, kommuneqarfiit kattuffiat KANUKOKA nunaqarfiillu peqatigiiffiat KANUNUPE.