KANUKOKA
Kanukoka nutaami siulittaasortaarpoq
Kommuneqarfiit kattuffiata Siumumeersoq Palle Jerimiassen siulittaasussamitut nutaatut toqqarpaa, Kommuneqarfik Sermersooq kattuffimmit aappaagumiit ilaasortaajunnaarniarluni nalunaaruteqareersorlu
Kommuneqarfik Sermersuup kommuneqarfiit kattuffiannit Kanukokamit aniniarluni nalunaaruteqareernerata kingorna, kattuffiup maannamut siulittaasorisaa, Siumumeersoq Martha Abelsen, Kommuneqarfik Sermersuumi kommunalbestyrelsimi ilaasortaasoq, aallartitat sisamanngornermi immikkut ataatsimiinnerminni allamik taarserpaat.
Siumumeersoq Palle Jerimiassen, Qaasuitsup Kommuniani kommunalbestyrelsimi ilaasortaasoq, siulittaasutut nutaatut qinerneqarpoq. Palle Jerimiassen siulittaasutut ukiup naanissaata tungaanut inissisimassaaq.
Atuaruk: Kanukokamut ilaasortaaginnarnissamut siunnersuut suliassanngortippoq
Kommuneqarfik Sermersuup Martha Abelsen Kanukokami siulittaasutut ukiup naanissaanut ingerlaqqinnissaanut innersuukkaluarpaa. Kisianni Palle Jerimiassen qulingiluanik qinerneqarluni siulittaasunngorpoq, Martha Abelsen tallimanik qinerneqartoq.
Kanukokami aallartitat Kanukokami tunngavissat pillugit sukumiisumik oqalliffiusussami junimi isumasioqatigiissapput, tamatumalu kingorna aamma 2016-imi januaarip aallaqqaataanit kattuffiup malittarisassaanik ilusissaanillu nutaamik aalajangersaaffiusussamik oktobarimi immikkut aallartitat ataatsimiisinneqaqqissallutik.
Atuaruk: Kanukokamut ilaasortaaginnarnissamut siunnersuut suliassanngortippoq