kommunit kattuffiat
KANUKOKA neriuutaaruttoq
Borgmester Malik Berthelsenip kommunit kattuffia KANUKOKA aarlerisaarpaa.
Siullermik Kommuneqarfik Sermersooq kommunit kattuffianiit KANUKOKA-miit anivoq, tullertullu Kommuneq Qeqertalimmi ikaarsaariarnermut ataatsimiititaliaq marlunngornermi 28. december aalajangerpoq, ukioq nutaamiit kommuni pilersinneqarpat aamma anissallutik.
Malik: Ingerlaannarnissaq pissusissamisuunngilaq
Taamaasilluni Kommune Kujalleq, Avannaata Kommunia aamma Qeqqata Kommunia kisimiilerput.
Borgmester Malik Berthelsenillu kommunit kattuffiat neriuutaarutsippaa, decemberimmi ulluisa 18-anni kommunalbestyrelsi ataatsimiilerpat, siunissaq eqqartorneqassaaq.
Qeqqata Kommunia KANUKOKA-mi ilaasortaanginnassava?
- Taamaaliorusukkaluarpugut, kommuninilu tallimaasuni marluinnaangutta pingasuinnaanguttaluunniit tamanna piviusorsiunngilaq, Siumut borgmesteriutitaa Malik Berthelsen, Sermitsiaq.AG-mut akivoq.
Matuneqaruni pitsaaneq
Malik Berthelsen isumaqarpoq kommunit kattuffiat matuneqaruni pitsaanerusoq. Kommunalbestyrelsilu 18 december ataatsimiilerpat tamanna innersuussutigissavaa.
- Isumaqarpunga ajusaarnartuusoq, suleqatigiillutami nukittunerusinnaangaluarpugut. Kommunillu taakku marluk aalajangernerat ataqqivara, Malik Berthelsen oqarpoq.
Suleqatigeeriaaseq nutaaq
Taassuma neriuutigaa kommunit suleqatigeeriaatsimik nutaamik, kommunit tamarmik peqataaffigisinnaasaannik nassaarniarnissaq pitsaanerusoq. Taannami oqarpoq:
- Suleqatigiittariaqarpugut ikioqatigiillutalu, Qeqqata Kommuniani borgmesteri neriuppoq.
Malik Berthelsenip oqaaseqarneratigut kommunit marluk – Avannaani Kujataanilu – kattuffiup ingerlatiinnarnissaanut tunngavissaqanngillat.