Monday, June 19, 2017 - 11:23

Kanukoka ikiuniarlutik suliaqartut 100.000 koruuninik tunissuteqarfigai

- Uummannap Sulluani arfininngormat pisoq alianaqisoq qamuuna tamatsinnik eqquivoq, ullullu arlallit qaangiusimalereeraluartut taamaattoq attortisimanerput aliasunnerpullu suli atorparput, Kanukokap siulittaasua, Simon Simonsen oqarpoq
Assi.: Ludvig Siegstad
Kommuneqarfiit Nunatsinni kattuffia Kanukoka Avannaani ikiuiniartunut aningaasanik tapiissuteqarput

Uummannap Sulluani arfininngormat pisoq alianaqisoq qamuuna tamatsinnik eqquivoq, ullullu arlallit qaangiusimalereeraluartut taamaattoq attortisimanerput aliasunnerpullu suli atorparput.

Kommuneqarfiit Nunatsinni kattuffiani Kanukokami siulittaasoq, Simon Simonsen taama oqarpoq.

Eqqarsaatitsinniipput Uummannap Sulluani inuit tamarmik - pingaartumik Uummannarmiut, Illorsuarmiut, minnerunngitsumillu Nuugaatsiarmiut. Sualummillu eqqarsaatitsigut najorpagut Nuugaatsiami maqaasineqartut ajunaartut sisamat ilaqutaat qanigisaallu. Aliasunnissinni ilaatigut suli paasiuminaatsorsiorfiusumi qamannga pisumik misiginneqataanerput apuukkusupparput. taanna oqarpoq.

Simon Simonsenip sineriassuatsinni inuit suliffeqarfiillu pisut qaangerniarneranni ikiuiniartut qutsatigaarpai.

Kanukoka-milu pinngitsoorumanngilagut ikiuiniarnermut atugassianik aningaasanik ikiorsiissuteqarniarluta. Taamaammat siulersuisut aalajangerput 100.000,00 kr.-inik Kanukoka ikiorsiissasoq, Simon Simonsen oqarpoq.

Ajunaarnersuup annertussusia eqqarsaatigigaanni aningaasat ikikkaluarput, neriuppugulli inuit nunaqqatigiillu eqqugaasut isumassorneqarnerinut assigiinngitsunut ilapittuutaajumaartut, Kanukokap siulittaasuaq taama oqarpoq.

Seneste nyheder / Nutaarsiassat kingulliit