Angallanneq
Kangiata sineriaanit ikioqquneq
Qulimiguullip teknikkikkut ajoquteqarnera pissutigalugu Nuummiit Tasiilamut angalaneq ullunit pingasunit sivisunerusoq
Nuummiit Kulusummut Air Greenlandip timmisartuanut ilaasut 30-t missaanniittut arfininngornermi ullaakkut nuanniilliutigisaminnik nalunaarfigineqarput, tassa ullut pingasut qaangiuppata Tasiilamut tikinnissartik naatsorsuutigisariaqaramikku.
Anorersuup imaluunniit nittaannerata angalaneq kinguaattoortinngilaa, kisianni qulimiguulik Kulusuup aamma Tasiilap akornanni angallassisartoq teknikkikkut ajoqueqarpoq, timmisartuussileqqissappallu kingoraarterutissaq Tasiilamut angallanneqaqqaartariaqarpoq.
Iliuuseqaqqusisoq
Taamatut misigisaqarnermi Demokraatineersoq Justus Hansen, Kangiata sineriaani atukkat akuerineqarsinnaanngitsut, aamma akuerineqarsinnaanngitsumik immikkoortitsisoqarneranik iliuuseqaqqusilluni allappoq. Atukkat taama ittut Nuummi pisinnaanngilluinnaqqissaartut naqissuserpaa.
- Nalunngilara nilliaatigiuarlugu Tunumi kiffartuussinerup qanoq ajortiginera, kisianni asuli pinngilanga. Nilliavunga isumaqarama assigiinngisitsineq ingerlanneqartoq akuerineqarsinnaanngilluinnartoq, Justus Hansen allappoq, tassanilu aamma allat ilagalugit ullut pingasut utaqqiniannginnamik allatut angalasariaqarnertik oqaluttuaraa.
Allatut angalaneq
- Qujanartumilli ukiorpassuarni kiffartuunneqarnerlunnerup eqqarsallaqqissisinnikuuaatigut. Taamaattumik ilaasussaagaluit ilaat aalajangerput najukkami angallassisartoq Siggi attartorniarlugu. Taakku qamuteralannik Kulusummi mittarfimmiit sikup sinaanut angallappaatigut imaatigullu angallalluta Senedivardiimi sikup sinaanut, tassani ilaquttanit, ikinngutinit ilisarisimasanit qamuteralattunit utaqqineqarpuggut Tasiilamut apuussinnaaqqulluta, Justus Hanse oqaluttuarpoq, taanna Kommuneqarfik Sermersuumi kommunalbestyrelsimut ilaasortaavoq.
Ajunngitsumik pineqartut
Ilaasup allap Sermitsiaq.AG-p oqaloqatigisaata ilisimatitsissutigaa, qulimiguullip marlunngornermi Tasiilamut ullut pingasunik kinguaattoorlutik nal. 10.15 apuussimagai.
- Kulusummi akunnittarfimmi kiffartuunneqarluaqaagut. Kisianni ulluni taama amerlatigisuni unnuisitsinermut nerisaqarnermillu isumaginninneq Air Greenlandimut akisusimassaqaaq, ilaasoq kinaassutsiminik oqaluttuarusunngitsoq oqaluttuarpoq.