Tasiilaq
Kangiata sineriaa sakkortuumik timersorfiunerulissasoq
Kangia takornariaqarnikkut ikiorniarneqartoq
Tasiilap eqqaani nunaannaq annertooq takornarianut sukisaarsarfittut susassaqarfittut atorneqarsinnaassaaq. Kommuneqarfik Sermersuumi Sanarfinermut Avatangiisinullu Ataatsimiititaq taama innersuussivoq.
- Immikkoortoq annertooq qinnuteqarfissatut immikkoortinneqarneratigut sumiiffimmi sakkortuumik timersornerup ineriartortinneqarnera taassumalu inuussutissarsiutit malitaannik allanik soorlu namminersortut kiffartuussinerat takornariaqartitsinermilu ineriartortinneqarnissaq ikorfartussavaa, Kommuneqarfik Sermersuumi Sanarfinermut Avatangiisinullu Ataatsimiititap ullumi ataatsimiinnerani oqaluuserisassani tamanna allaqqavoq.
Atuaruk: Tunumi akunnittarfiutilik iluatsitsilluartoq
Immikkoortoq nunataq Tasiilap eqqaa sermersuullu ilaa annertooq, sineriammiit 180 km isorartutigisoq pineqarpoq.
- Kommunimut pilersaarummut tapiliussaq tunumi namminersorluni inuussutissarsiornerup ineriartortinneqarnissaanut kissaateqarnermut naapertuuppoq, tamanna oqaluuserisassami oqaatigineqarpoq.
Tasiilap eqqaani nunami annertuumik heliskiing atorlugu sisorarnermut akuersissutinut qinnuteqaat tiguneqarsimanera aallaavigalugu Kommunimut pilersaarummut tapiliussaq suliarineqarpoq, tamanna allaqqavoq.
Sammisassanut siunnersuutit amerlanerusut
Siunnersuut akuerineqassappat, Kommuneqarfik Sermersooq sammisassanik takornarissanut neqeroorutigisinnaasanut arlariinnik isumassarsiaqarpoq.
Heliskiingip saniatigut assersuutigalugu skitouring, ujakkaarneq, aputisiutinik pisuuteqarluni pisuttuarneq, qimusserneq, qamuteralanneq, pisunneq, majuarneq qaqqasiornerlu, sikumut sermersuarmullu majuarneq, sikumi sermersuarmilu pisunneq.
Atuaruk: Takornarissat piniartuiunngitsut piumanngilaat
Sumiiffimmi sammisat pioreersut, soorlu sunngiffimmi angallammik angalaneq, qimusserneq, qamuteralanneq takornarianut neqeroorutip ajortumik sunniuteqarfiginavianngikkai nalilerneqarpoq.
Maniitsoq aamma Kangaamiut Kitaani heliskiingernermut ullumi periarfissaapput.