pisoq alianartoq
Kangerlussuarmi toqutsisoqarlunilu imminut toquttoqartoq
Kangerlussuarmi angut toqungasoq nassaarineqartoq, angut alla imminut toqussimasorineqartoq aamma nassaarineqartoq, arnaq annersarneqarsimanermi kingorna aqqunartitersimaqisoq aamma nassaarineqarsimavoq
Qeqqani politiit Kangerlussuarmi immikkoortortaqarfiat sisamanngornerup unnuaani nalunaaqutaq 03.06 innuttaasut ilaannit attavigineqarput kalerriuteqarusuttumik Rustenborgimi nangikkiaasoqarnerata nalaani aallaammik seqqortoqarsimasoq.
Politiit ornigunnerminni angutit marluk, aappaa 33-nik ukiulik aappaalu 29-nik ukiulik, tamarmik aallaaneqarnermik kingorna toqusimasut nassaaraat, arnarlu aamma 34-nik ukiulik annersarneqarsimanermi kingorna aqqunartitersimaqisoq nassaaralugu.
Taama Qeqqata Politiviini pisortaq, politikommissæri Johan Davidsen, tusagassiuutinut nalunaaruteqarpoq.
Johan Davidsenip ilisimatitsissutigaa angutip aappaa toqunneqarsimasoq, angutillu aappaa imminut toqunnermi kingorna toqusimanissaa ilimagineqartoq.
Arnaq Nuummut aallarunneqarpoq
Arnaq 34-nik ukiulik aqqunartitersimaqisoq Nuummi Dronning Ingridip Napparsimavissuanut sisamanngornerup ullaavani aallarunneqarsimavoq, navianartorsiortutullu nalilerneqarluni.
- Misissueqqaarallarnerit qanoq pisoqarsimasinnaanera ilimanarsisippaa, aammalu ilimanaateqanngilaq allamik pasisamik suli angalaartoqarsinnaanera, Johan Davidsen oqarpoq.
Politiit maannamut allanik paasissutisseeqqissinnaanngikkallarput, misissuineq suli ingerlammat.
Johan Davidsenip paasissutissiinera malillugu pinerluttoqarsimatillugu paasiniaasartumik alianartumik pisoqarfiusumiittoqarpoq, soorlu aamma toqusut timaanik misissuisartumik Danmarkimiit ataasinngorpat tikittussamik aggersaasoqarsimasoq. Tamatuma saniatigut politiit aamma Rigspolitiiniit pinerluttoqarsimatillugu paasiniaasartunik ikiorserneqarnissaminnut piumasaqarsimapput.
Toqusut ilaqutaat kalerrinneqareersimapput.