Kangerlussuarmi takornarialerineq 100 millioninik kaaviiaartitaqarpoq
Kangerlussuarmi takornarialerinermi 100 million koruunit sinnerlugit kaaviiaartinneqartarput, 180-inullu atorfeqartitsilluni. Tamanna isumasioqatigiinnermi Qeqqata Kommunianit ilisimatitsissutigineqarpoq.
Qeqqata Kommuniani takornarialerisut 136 million koruuninik kaaviiaartitaqartoq kiisalu ukioq naammatsillugu atorfiit 246-t nalinginut atorfinitsitsisimasut Qeqqata Kommuniata isumasioqatigiisitsinerani ilisimatitsissutigineqarpoq.
- Takornariaqarneq Qeqqata Kommunianut, Kalaallit Nunaannullu qanoq pingaaruteqartiginersoq kikkunnut tamanut ersarinnerulerpoq, Malik Berthelsen tusagassiutinut nalunaarummi oqarpoq.
Inuussutissarsiutit takornariaqarnerlu pillugit Inuussutissarsiornermut Nukissiuuteqarnermullu Naalakkersuisoq Aqqalu Jeremiassen sapaatip akunnerata naanerani isumasioqatigiissitsivoq, ataasinngormallu attaveqaqatigiinneq pillugu Ineqarnermut Attaveqarnermullu Naalakkersuisoq Simon Simonsen isumasioqatigiissitsilluni.
Maniitsoq massakkut sapaatip akunneranut sisamariarluni timmisartunik tikinneqartartoq, sapaatip akunneranut marloriaannarluni tikinneqartalissaaq, qularnanngitsumillu Paamiut peqatigalugit sullissinissamik isumaqatigiissutinut ilanngunneqarluni.
Attaveqaqatigiinneq pillugu isumasioqatigiinnermi Simon Simonsen mittarfinnut pilersaarut, angallannerullu aaqqissuussaanerata pitsanngorsartariaqarnera pillugit paasissutissiivoq nuannaarutaasumik. Kangerlussuup siunissaa mittarfissualiornissat pillugit Inatsisartuni aalajangerneqarumaartoq oqariartuutigereerpaa.