Kangerlussuarmi ikaartarfik peerummat ukiup ataatsip kingorna

2012-mi juulip qiteqqunnerani Sermersuup aannera sualunnersaavoq. Ukiorlu ataaseq qaangiuppoq Kangerlussuarmi kuup Watsonip qarsutsinerujussuanit ikaartarfik kuugullugu.
– 2012-mi juulip 11-anni DMI-p Summit-imi uuttortaaviata, 3200 meterinik qaffasissusilimmiipput, uuttorpaa 2,2 gradinik kiattoq, 2012-milu juulip 12-ianni NASA-p satellitsiisa nalunaarsorpaat Sermersuup 97 procentia aakkiartortoq, silap pissusianik ilisimatooq Ruth Mottram oqarpoq.
Aamma atuaruk: Kangerlussuarmit nutaarsiassat kingulliit
Qanittukkut ilisimatuut misissuinerat saqqummiunneqarpoq, tassani DMI-mi ilisimatuut sermip aakkiartorneranut nassuiaateqarlutik. Misissuinermi qulaajarneqarpoq 2012-imi aasakkut naqitsinertuffik mattussisoq Kalaallit Nunaata qulaani atuuttoq - soorlu 2007-miilli aasani kiattuni taamaattarsimasoq.
Silap pissusia pissutigalugu kujataanit silaannaq kissartoq sineriak atuarlugu avannamukarpoq. Taavalu Kalaallit Nunaata qulaani ´kiaqarfeqalerpoq´ tamatumalu aamma kinguneraa sermip qaavata aakkiartornera.
Ikaartarfik sananeqaqqippoq
Ukioq manna eqqissisimanaruvoq. Kuup Watsonip ikaartarfia sananeqaqqileruttorpoq, maskiinallu entreprenørit atortui imermik akornusersorneqanngillat.
– 2013-imi juunimi Sermersuaq aakkiartupiloorsimagaluarpoq, 2012-imili juulimisut sualutsiginngitsumik, silap pissusianik ilisimatooq Peter Langen oqarpoq.