Kangerlussuaq: Nunaqarfik kipiluttunarsiorfiusoq
Kangerlussuarmi innuttaasut kipiluttunartorsiorput. Kangerlussuup ineriartortinneqarnissaanut atatillugu Naalakkersuisunit tapersersorneqartutut misigisimanngillat. Pisortat illuutaat aserfallakkiartorput, inuussutissarsiutinillu ingerlatallit illuutinik tamakkuninnga tiguseqqusaanngillat.
Takornarianit Kangerlussuarmi pinngortitaq sunniivigineqarsimanngitsoq sermersuarmullu misigisassarsiornerpassuit, umimmannik takuniaanerit kangerlummilu angalaarnerit nuannarineqarluarput. Nunaqarfilli kusanaatsutut kajungernaatsutullu oqaatigisartagartik nuannarinngilaat.
Aviisi Sermitsiaq allappoq.
- Allaanngivippoq Naalakkersuisut maani Kangerlussuarmi ineriartorneq unitsissimagaat. Mittarfimmik ingerlatsissaagut, allamik naamik. Taama takornariartitsisartoq Jens-Pavia Brandt, suliffeqarfimmik Greenland Outdoorsimik piginnittoq, oqarpoq. Namminersorlutik Oqartussat Kangerlussuaq takornarianut kajungernarnerusinnaaqqullugu illuutiminnik sooq aserfallatsaaliisannginnerat paasisinnaanngilaa.
Periarfissat
- Kangerlussuaq sivitsortumi periarfissaqarsimavoq, Sisimiunullu aqqusineq piviusunngortinneqarpat periarfissanik nutaanik ammartoqassaaq. Naalakkersuisutsinnit ineriartornerup tamatuma kigaallassimaartinneqarnera eqqumiigaara. Mittarfeqarfiit (MIT) Kangerlussuarmi illorpassuarnik pigisaqarput. Illut atorneqanngitsut, kisiannili uninngaannartut aserfallakkiartortullu igalaavi aserortersimasut qaliaallu putoortut. Tamatuma peqatigisaanik inuussutissarsiortutut namminersortutut illuutinik pisisinnaatitaanngilagut taakkunanilu niuernermik ingerlatsisinnaanata, Jens-Pavia Brandt oqarpoq, nunaqarfimmilu inuussutissarsiortunik arlalinnik MIT-ip illuutaanik aserfallassimasunik pisiumagaluarnerminni itigartinneqarsimasunik arlalinnik assersuutissaqarnerarluni.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: