Kangerlussuaq
Kangerlussuaq nutaamik umiarsualivittaassaaq
Suliniummut 50 millionit koruuninik Naalakkersuisut neriorsuipput, Qaasuitsup Kommunia ilisimatitsivoq
Qeqqata Kommuniani kommunalbestyrelsiata piffissami sivisuumi Kangerlussuarmi umiarsualiveqarnerup pitsaanerunissaa kissaatigaat. Maannalu pilersaarutit aallartinneqalerput, Qeqqata Kommunia ilisimatitsivoq.
Neriorsuut eqquutsinniaraat
Naalakkersuisut, Kim Kielsen, Vittus Qujaukitsoq aamma Knud Kristiansen kommunalbestyrelsillu akornanni aggustip 18-ani ataatsimiinnerup kingorna, nunaqarfik umiarsualivittaassasoq paasinarsivoq.
Pitsaanerusumik umiarsualiveqalernikkut ilaatigut umiarsuit takornariartaatit tulannissaannut ajornannginnerulersitsissaaq.
Atuaruk: Borgmesteri Kangerlussuarmi umiarsualivimmik nutaamik ujartuisoq
2017-imi aallartissasut
Kangerlussuarmi umiarsualivik piaartumik sanaartorneqartariaqartoq, umiarsualiviliornissamullu Naalakkersuisut 2017-imut aningaasanut inatsisitigut Qeqqata Kommunianut 50 millionit koruuninik aningaasaliissuteqassasut, kommuni naapertorlugu illuatungeriit isumaqatigiissutigaat.
Naalakkersuisut siornatigut Kangerlussuami umiarsualivimmut pilersaarutinut neriorsuutit attatiinnarmatigit Qeqqani kommulabestyrelsip aamma nersualaarpaat.