Kangerlussuaq
Kangerlussuaq biilinut misileraavissuanngortoq
Kangerlussuup eqqaani biilinut misileraavissaanut Qeqqata Kommuniata nunaminertamik atugassippaa
Arjeplog Test Manegement, biililiortarfissuit soorlu BMW-kkut kiffartuullugit biilit nutaat tuniniarneqannginnerini issittumi misileraasartuuvoq. Apummi sikumilu ingerlasinnaassusii misilerartarpaat, soorluttaaq Kangerlussuup issileruttornerani biilit elektronikkii issimit qanoq sunnertittarnersut misilerartaraat.
Oktobarip qeqqata missaanit novembarip qeqqata missaanut naatsorsuutigisamik misileraanissami qularnanngitsumik suliffiit 20-30-t pilersinneqassapput, Qeqqata Kommunia nalunaarpoq.
Suliffissat 200-t qaangerlugit
Misileraavinnissaq sioqqullugu Arjeplog Test Management ikitsuinnarnik sulisoqarluni misileraanissaq piareersassavaat, soorluttaaq misileraanissaq sioqqullugu kingornalu paasissutissanik katersisoqarumaartoq.
- Siunissami ataavartumik misileraaveqalissappat, misileraanerup nalaani Kangerlussuarmi suliffissat 200-250-inik amerlissapput, Qeqqata Kommunia naliliivoq.
Misileraaveqareernikuuvoq
1999-imit 2005 tikillugu Sermersuarmi 120 km-inik takitigisumik misileraaveqarnikuummat, Kangerlussuaq siornatigut biilinut misileraaviunikuuvoq.
Biilinut misileraavissaq nutaaq Sermersuarmiissanngilaq, misileraanerillu aqqusinerni piusuni, tatsini Kangerlussuullu qanitarisaani nunami ingerlanneqartassallutik. Biilinut misileraavissaq massakkut Kangerlussuarmut qaninnerusussaammat, matumani Kangerlussuarmut sunniuteqassasoq kommunip naatsorsuutigivaa.
Nunap assinga ilanngunneqartoq naapertorlugu Akuliarusiarsuup kuuata ilaani, Aajuitsup Tasiata kangiatungaani, Lake Helen-imi, Akuliarusiarsuup kuuatalu kitaatungaani tatsimi, ATM nunaminertamik atugassinneqarpoq.
Pilersaarutit ataani takukkit