saarulliit
Kangaatsiaq: Tunisinermi atugassarisat pitsaanerusut
Kangaatsiami suliffissuarmi qerititsiviit amigarput taamaattumillu akulikinnerusumik imaarneqartariaqartarlutik, Nikolaj Jeremiassen, Siumut, isumaqarpoq
Royal Arctic Linep assartuutaa ullut 14-ikkaarlugit Kangaatsiamut tikittarpoq. Tamanna akuttuallaaqaaq, Siumut tunuliaqutaralugu Inatsisartunut ilaasortaq Nikolaj Jeremiassen isumaqarpoq, taassumalu paragraf 37 naapertorlugu apeqqummigut paaserusuppaa Kangaatsip eqqaani tunisinermi ajornartorsiutit aaqqinniarlugit Naalakkersuisut sunik pilersaaruteqarnersut.
– Ullut 14-ikkaarlugit tikittarnera taassumallu malitsigisaanik tunitsiviup qerititsiviata imaarneqartarnera soorunami akuttuallaarpoq, pissutsillu massakkutuut aalisartut sivisoorujussuarmik utaqqisarnerat akuersaarneqarsinnaanngittoq ingerlaannartussaavoq, Nikolaj Jeremiassen tunngavilersuummini allappoq nangillunilu:
– Taamaattumik kissaatigaara ajornartorsiutip qanoq aaqqinneqarsinnaanera Naalakkersuisut misissussagaat.
Upernaakkut ataatsimiinnermi Kangaatsip eqqaani tunisinermi periarfissat killeqarnerat Nikolaj Jeremiassenip tikkuareersimavaa. – Qanorli pisoqarsimanngilaq, apeqquteqarnerminut atatillugu allappoq.
Tamanut Avannaani-mi qanittukkut atuarneqarsinnaavoq aalisartut 60-it missaanniittut Kangaarsiami saarullinnik tunisisinnaaneq isumalluutigigaat, tassanilu aalisakkanik suliffussuarmi sulisorineqartut 20-t missaanniittut. Illoqarfimmi aalisartut piniartullu peqatigiiffianni KAPP-mi siulittaasoq Pavia Martinsen oqarpoq tamaani saarullippassuaqartoq.
Ajornartorsiut sakkortuseriarsimavoq nunaqarfiup angallataa Anguteq Ittuk Nuummi amutsivimmiissimanera. Taanna ippassaani singinneqarpoq maannalu avannamut ingerlaarluni.