Kangaatsiami angallatit kivisut: PN-p apeqqutigaa eqqugaasut ikiorneqarsinnaanersut

Sapaatip akunnerani kingullermi sineriak tamakkerlugu anorersuallarmat Kangaatsiami angallatit - pingaartumik aalisariutit - ikinnerpaamik 11-t kivipput.

Maanna Anthon Frederiksenip, Partii Naleqqameersup, paragraf 37 naapertorlugu Naalakkersuisunut apeqqutigaa Kangaatsiami aalisartut piniartullu, anorersuarneratigut angallammik inuussutissarsiumminnik annaasaqartut, pisortanit ikiorserneqarnissaannut sunik periarfissaqarnersoq.

– Sapaatip akunnerani kingullermi anorersuarneratigut aalisartut piniartullu ilaasa umiatsiaaqqatik pituttorluarsimagaluarlugit annaavaat, ukiulli anorersuanik anorersuarujussuarnera pissutigalugu aalisartut piniartullu ilaasa inuussutissarsiornerminni tunngavitsik annaavaat, Anthon Frederiksen allappoq.

Anorersuaq Kangaatsiami angallatinik kivioraatitsereersoq Qaasuitsup Kommuniani borgmesterip Ole Dorphip, Siumumeersup, pisimasoq erloqinartutut isigaa kajumissaarutigalugulu ataatsimooqatigiilluni tapersersoqatigiillunilu ikioqatigiinniarnissaq.

– Tamakkua ilaat pisortanut oqartussaasunut saaffiginnissimagaluarput, oqarfigineqarsimallutilli pisortanit ikiorserneqarsinnaanngitsut namminersortuummata, Anthon Frederiksenip paragraf 37 naapertorlugu Naalakkersuisunut apeqqunni ilaatigut tunngavilersorpaa.

– Taamaattumik Partii Naleraq sinnerlugu matumuuna Naalakkersuisunut apeqqutigissavarta inuit pissutsinik taamaattunik eqqorneqartut, imminullu pilersornissaminnut allanik periarfissaqanngitsut, tamakkua pisortanit ikiorserneqarnissaminnut sunik periarfissaqarpat, Anthon Frederiksen Partii Naleraq sinnerlugu Naalakkersuisunut aperivoq.