Qaanaaq
Kallerup innera qamippoq: Issi ernummatigaa
Ilaqutariit meerartallit anorersuarmit issersuarmillu eqqugaasut.
Ippassaq Qaanaami silarlorujussuarnera arlaleriarluni innuttaasunik annilaangatitsivoq. Taarsuup nalaani anorersuarnerata nalaani sisamariarluni kallerup innera qamippoq.
- Tassa.... qanoq ililluta kissassimaassanerluta eqqarsaatigisarparput, Avanersuup Atuarfiata piortaa attortisimaqisoq oqaluttuarpoq, ullumikkulli silarlorujussuarnerata kingorna aseruatiterimasut misissuleruttorpai.
Kallerup innera qameqqaarmat qanoq sivisutigisumik qaminngajumaarnera ilisimasimanngilaa.
- Immaqa minutsit tallimaannaat, piffissalli ingerlarna malugisimajunnaarnartoq, Dan D. Normann Sermitsiaq.AG-mut oqarpoq.
Taanna marlunnik mikisunik meeraqarpoq; ataaseq arfineq marlunnik qaammatilik, aappaalu arfineq marlunnik ukiulik. Kallerup innerata qaminnganerata nalaani meeqqami isumannaatsuunissaat salliutillugu eqqarsaatigisariaqarsimavaa.
- Silaannarissarfiit matooqqarpavut igalaallu saagortiterlugit, Dan D. Normann oqaluttuarpoq taassumalu anorersuup nakertinnerata nalaani sekundimut 48,4 meterimik sakkortutigisumik illoqarfik anorersuartoq nalunaarsorsimavaa.
Danmarks Meteorologiske Institutimi pingaartup meteorolog Mogens Rønnebekip issip issersuullu pingasunngormat Qaanaami silap nalinginnaanngitsumik pissuseqarneranik pilersitsisimanera oqaluttuaraa.
- Siornatigut taamaattoqarneranik nalaataqarsimanngisaannarpugut, taanna Sermitsiaq.AG-mut oqarpoq.
Qaanaaq nillertumik avannertillugu "silaannarmik oqimaatsumik nakkaavigineqartartoq" DMI-p nassuiaatigaa. Tamanna illoqarfiup qaqqap kujammut alannguaniinneranik patsiseqarpoq, taamaanneranilu qaqqap tunuanit anori aqqarsaartarpoq. Silaannaap nillertoq kaavittuliortoq, nalinginnaasumik Qalasersuarmiittartoq maanna nalaassimaarpoq.
Avannamik kangisimmik anorersuarnerata kinguneranik imarorpoq, ippassarlu Qaanaap itertaata kujataani imaq annertooq takuneqarsinnaavoq.
Qaanaarmiullu piffissami aggersumi silagissiortussatut isikkoqarput.
- Ississaqaaq, ullunili marlussunni anoreqanngilaq, meteorolog pingaartoq Mogens Rønnebæk DMI-meersoq siulittuivoq.