Inatsisartut

Kalistat Lund tamaammat Inatsisartunit tunuarpoq

IA-mi politikeri Narsameersoq, Kalistat Lund, Inatsisartunit tunuarniarluni aalajangerpoq, sinniisorlu Kelly Berthelsen ilaasortanngortinneqarpoq.

Kalistat Lund Inatsisartunut ilaasortaajunnaarpoq

Inatsisartunut siulittaasup, Lars Emil Johansenip, Inatsisartut upernaakkut ataatsimiinnermi siullermi tikilluaqqusereerluni ilisimatitsissutigaa, Kalistat Lund, IA-mi politikeri Narsameersoq tunuarniarluni aalajangersimasoq.

Kalistat Lund siullermik 2013-imi Inatsisartunut qinigaavoq, 2015-imilu qinigaaqqilluni. Ukiuni sisamani politikeriunermi saniatigut inuinnartut atorfini piffissap ilaani paariinnarniarsarisimavaa.

- Aalajangeruminaassimavoq, kisianni malugisinnaavara marlunnik atorfeqarneq attassinnaanagu. Inuinnartut atorfinni unammillernartoqartissimavara, tassani qulimiguulimmi annaassiniartartumi naalagaallungalu pilotiuvunga. Pilotitut atorfiga ingerlatiinnassagukku sungiussisimanerma attannissaanut piffissaqarnerusariaqarpunga, Kalistat Lund Sermitsiaq.AG-mut oqaluttuarpoq.

Tamanna nammineq aalajangiussaralugu ilisimatitsissutigaa, suliffeqarfillu atorfeqarfigisani piumasaqarsimannginnerarlugu.

- Aalajangerneq ajornaatsuinnaanngilaq. Kisianni malugisinnaasimavara, qinersisartut naapillugit politikkimik oqaloqatiginissaannut piffissaqarfigisimanagit, qulimiguullip naalagaa Narsameersoq oqarpoq.

Taanna ullumikkut 57-inik ukioqarpoq, pilotitullu atorfini ukiuni arfineq-marlunni ingerlateqqinniarlugu naatsorsuutigaa. Tamatuma kingorna qinigassanngorteqqissanerluni itigartitsitsissutigerusunngilaa.

- Politikkimut uteqqinnissamik itigartitsisoqarsinnaanngilaq. Tamanna uanga misilittagaqarfigaara. Piffissap takutikkumaarpaa, taanna oqarpoq.

Powered by Labrador CMS