aliikkusersuineq
Kalassineq illarratigalugu
Nuummi aliikkusersuisartut isiginnaartitsisartullu N.A.I.P. ukiumoortumik Katuami tallimanngornermi arfininngornermilu aliikkusersuissamaalerput
Kulturip illorsuani Katuami tallimanngornermi arfininngornermilu aliikkusersuinissaq inuppassuarnit qilanaarineqarpoq. Aliikkusersuisartut isiginnaartitsisartullu N.A.I.P. aliikkusersuissamaalerput kalassineq qulequtaralugu.
Isiginnaagassiat naatsukkaat atorlugit aliikkusersuineq ingerlassaaq kalassinermi aqqusaarneqartussat ilagalugit qilaatersorneq, thai-massage, atisanik takutitsineq, ilaqutariit Aamuusikkut, Kendama minnerunngitsumillu erinarsorlunilu qitittoqartassalluni.
- Piareersarnerput augustip naalernerani aallartippoq taamanerniillu sapaatip akunnerannut sisamarianngikkaangatta tallimariarluta sungiusartarpugut. Maanna misigivugut aliikkusersuinissamut piareerluta, N.A.I.P.-mi siulittaasoq Ane Berthelsen Sermitsiaq.AG-mut oqarpoq.
Aliikkusersuineq tallimanngornermi arfininngornermilu unnukkut arfineq marlunut aallartittassaaq nalunaaquttap akunnerat aappaa affaq sivisussuseqassalluni.
- Aliikkusersuineq KNR-TV-mit immiunneqartussaavoq pilersaarutaalluni ukiutoqqami Ukioq naangujutut aallakaatinneqarnissaa, Ane Berthelsen oqarpoq.
Aliikkusersuinermi Sermitsiaq.AG najuutissaaq assillu sapaatip akunnerata naanerani nittartakkami takuneqarsinnaalerumaarlutik.