Nittarsaassineq

Kalaallit takornariaqarnerannut nersornaat

Nunani tamalaani takornariaqarneq pillugu filmfestivaleqanerani Visit Greenland ajugaavoq

Visit Greenland ukiuni kingullerni assit videollu pitsaasut atorlugu Kalaallit Nunaat nittarsaannissaa ukkataraa

Takornariaqarnermut siunnersuisoqatigiit Visit Greenland ART & TUR FILM Festivalimi, qanittukkut Portugalimi pisumi ajugaavoq.

Visit Greenland 'takornariaqarnermut siunnersuisoqatigiinni nutaaliullaqqinnerpaatut' nersornaaserneqarpoq.

Visit Greenlandip nittarsaassaa 'Pioneering Nation' 2011-imeersoq naliliisartunit nuannarineqarluarpoq.

Tulluartoq
Takornarialerisut siornatigut Kalaallit Nunaat alianaallisarlugu saqqummiuttarnikuugaat, takornariaqarnermut siunnersuisoqatigiit nutaamik nittarsaassipput, taanna takornarissat misigisassaannik tulluarnerusumik saqqummersitsivoq.

Tassanilu pingaarnertut misigisassat tallimat nittarsaanneqarput, taakku Kalaallit Nunaat misigisassarsiorfittut angalaffissatut nittarsaatissavaat: Arferit, qimusserneq, arsarnerit, sermeq aamma minnerunngitsumik nuna maligassiuisuuffiusoq.

Assit videollu
Kalaallit Nunaat assinik aamma videonik tamakkuninnga suliaqartunit nittarsaanneqarnissaa, Visit Greenlandip saniatigut aamma ulapputiginikuuaa.

Visit Greenlandip uani videomi suliaq pillugu oqaluttuarnera takusinnaavat, tamannalu aamma ajugaanerannut tunuliaqutaavoq.

Tunuliaqutaa immikkuullarissoq
- Pioneering Nation atorlugu Visit Greenland angalaffissamik immikkuullarissumik tunuliaqutissaamik pilersitsivoq, misigisassat, kalaallit kulturiat aamma inuttai, naliliisartut erseqqissaapput.

Atuaruk: Nunarput kusanarnerpaamik kiinnertinneqarpoq

Takornarialerisut nunanit 52-ineersut, Frankrigimit, Canadamit, Tysklandimit, Spaniamit, Ruslandimit, Tyrkietimit aamma Finlandimeersut, katillugu 300-nik festivalimi unammisitsinermut nassiussisimapput.

Festivali oktobarip 19-annit 22-annut ingerlanneqarpoq, aaqqissuussarlu qulingiluassaannik ingerlanneqarpoq.

Powered by Labrador CMS