Nettimi sammisaq

Kalaallit Se og Hør kamaappaat

Se og Hør-imi Mads Christensenip Modepoliti-mik taallugu aallaatigisartakkamigut kalaallisuut illaruaatigai - tamanna akaarineqanngilaq

Mads Christensenip -imi Modepoliti-tut taasami kalaallisuut pillugit oqaaseqaatai Se og Hør

Imminut ´pingaakujunniartutut´ taasartoq Mads Christensen ukiorpassuarni Se og Hør-imi Modepoliti-mik taasaminik tusaamasat atisaannik uparuartuilluni allaaserinnittartoq pissutigalugu, aviisi sapaatip akunneranut saqqummersartoq kalaallinit saassutarineqarpoq.

Aalassatsitaasimasut ilagaat Brian Schlüter Fontain, taassumalu allaaserisamit tassannga assi una Facebookimut ilivaa. Assi naatsumik oqaaseqarfigalugu Se og Hør imatut uparuarpaa:

– Kanngunaqaaq kalaallit assuutaat kaallisooq sisorarfimmi atisatut taammagu. Mamaak!
Tamanna amerlasuunit taperserneqareersimavoq.

Takuneqarsinnaalluarporli amerlasuut nalunngikkaat Mads Christensen illaruaatiginninniartartuusoq, Se og Hør-ilu sukkasuumik Brian Schlüter Fontainimut imatut akissuteqarpoq:

– Hej Brian. Mads Christensenip kalaallisuut sananeqaataat kinaassusersiunngitsumik nalilerpai. Kalaallisuut kisiisa oqaaseqarfigai. Sapaatip akunnera naanersiorluariuk.

Kalaallisuunik illaruaatiginnissutit
Se og Hør-ip inuit misigissusaannik attuiinerujussuanut pissutaavoq Mads Christensen grevinde Alexandra-p kalaallisuui pillugit allammat imatut qulequtalerlugu ´Sii sii sisorarfimmi´:

– Alexandrap ukiumut kunngikkormiutut aningaasassaqartinneqarneranut pissutaavoq ilaatigut prinsiaqqat atugarlioratillu kaattassanngimmata, ilaatigullu Danmarki sinnerlugu sassartarnerpassuarisimasaminut sulilu sassartarnerminut akissarsiaqartinneqassammat. Ilaatigut soorlu 1997-imi Kalaallit Nunannut tikeraarnerminut. Kalaallit arnanik isiginnittaasiat Modepolitiit ilisimanngilaat, atisaalli... ilaaruaatissaannaapput. Pissusissamisuuginnarpoq Alexandrap sisorarfimmi atisalersuutinik nikanarsarneqarami naammattumik akissarsiaqartinneqarnissaa.

Mads Christensenip kalaallisuut pillugit oqaasii qanoq isumaqarfigaagit? Ingasaassiva? Taava sooq? Imaluunniit ingasaassinngila, suna pissutigalugu? Ataani oqallinnerni peqataagit

Powered by Labrador CMS