Kalaallit Røde Korsiat atisanik nerisassanillu agguaasseriaannanngorpoq

Aqagu Uummannami Kalaallit Røde Korsiat sullissivittaassaaq. Tassani Nuugaatsiami Illorsuarnilu innuttaasuisa ikiorserneqarnissaat ataqatigiissarneqassalluni.

- Qimangussorneqarneqarsimasut ikiorneqarusuttut saaffiginnissinnaapput, Sebastian Ole Krogh Koefoed suliami ataqatigiissaarisoq oqarpoq.

Piumassutsimik suliaqartut Kalaallit Røde Korsianeersut aammattaaq Uummannamut angalaqataapput, taakku sullissiviup sivisunerpaamik ammatinneqarnissaanut ikiuutissallutik.

- Siullermik naatsorsuutigaarput atisat agguaanneqarnissaat aammalu pisariaqartitsisoqarpat nerisassanik tunissuteqarsinnaassalluta.

Tassaarsuaqarnerata kinguninnguaq Nuummi sineriammeersulli eqqugaasunut atisanik katersuiniarsimapput. Taakku atisat suli immikkoortitserneqassapput, kikkulli qanoq ittunik pissarsissanersut ataqatigiissarneqassallutik.

Ikiuutissalli atortussiaannaassanngillat

- Qimangussorneqarsimasut Uummannamiluunniit innuttaasut oqimaatsorsiorunik, oqaloqatiginninnissaanik neqeroorfigisinnaavagut.

- Tarnillu nakorsaanik pisariaqartitsisoqassapput, tarnip nakorsaanik aggersaasinnaalluta, Sebastian Ole Krogh Koefoed oqarpoq.

Uummannami Kalaallit Røde Korsiat islandimiut Røde Korsianinngaanneersup, Jón Brynkar Birgisson-ip, qarsutsinersuarmit innermillu anitsisoqarsimatillugu ikiuinermik misilittagalik ikiuutissaaq.

Aaqqissuussinermi ikiorsiisutissallu nalunaarsorneqarnerini taassuma misilittagai atorneqassapput.

Kalaallit Røde Korsiata Uummannami suliaqarnerat Qaasuitsup Kommunia aamma Namminersorlutik Oqartussat qanimut suleqatigineqarput.

- Aammattaaq Uummannap kommuniani sulisut tassaarsuaqarnerata kingornali ulapissimaqisut oqilisaatissavagut.

- Inuit apeqqutissaqarunik arlaannilluunniit iluarinngisaqarunik uagutsinnut saaffiginnissinnaapput, tassaanngaanniik sapinngisarput tamaat ingerlariaqqinnissaannik tikkuussissalluta.

Aammaattaaq eqqarsaatigaarput meeqqat sammisassaqartinnissaat, tassani nunaqarfinneersuunerit Uummannaminngaanneersuuneriluunniit apeqqutaatinneqassanani.

Atisat nerisassallu ikiuutissat tunniunneqareernerisa kingorna Kalaallit Røde Korsiata sullissivia ingerlangallarnissaa eqqarsaatigineqarpoq.