qinersineq
Kalaallit qinersisartut Naalagaaffeqatigiinni ikinnerpaapput
Danmarkimi Savalimmiunilu qinersisartut Kalaallit Nunaannit qinersisartunit procentini qulini amerlanerupput
Inatsisartunut qinersisoqarpat tallimanngornermi novembarip 28-ani qinersisartut amerlanerulernissaannik periarfissaqartoqassaaq. Procentinngorlugit Danmark aamma Savalimmiut amerlanerusunik qinersisartoqarput.
Danmarkimi qinersisinnaasut qinersinerni marlunni kingullerni 86 procentit aamma 86,9 procentit Folketingimut qinersipput. Savalimmiuni qinersinerni kingullerni marlunni qinersisinnaasut 89,3 procentiullutillu 86,4 procentiupput. Nunatsinni qinersinerni marlunni kingullerni 72,6 procentiullutillu 74,2 procentiupput.
Nordisk Statistisk Årbog 2014 tamanna saqqummiunneqarpoq.
Nunat avannarliit qiviassagaanni Kalaallit Nunaat Ålandimit Finlandimiillu amerlanerusunik procentinngorlugit qinersisartoqarpoq. Ålandimi 67,8 procentiullutillu 66,9 procentiupput, Finlandimi 64,6 procentimi aamma 67,0 procentimiillutik.
Kalaallit Nunaalli nunanit allanit avannarlerneersunit ukunanit procentinngorlugu qinersisartoqarpoq: Island 82,3 procentinik 82,1 procentinillu, Sverige 80,6 procentinik aamma 83,7 procentinik kiisalu Norge 76,0 procentiik 77,9 procentinillu qinersinerni kingullerni marlunni qinersisoqarlutik, Nordisk Statistisk Årbog 2014-mi atuarneqarsinnaavoq.