Kalaallit pillugit isiginnaagassiamut peqataanissamut soqutiginnittorpassuit

Kalaallit arnartaat Aalborgimi najugaqartut pillugit isiginnaagassiornissamut paasissutissiissummik ataatsimiittoqarnerani inuit 40-t missaanniittut peqataapput. Isiginnaagassiassamut 'Grønlændere i Aalborg - Kalaallit Aalborgimittut'-nut pillugu taamatut aaqqissuussaqartoqarpoq.

Isiginnaagassiassaq suli allallugu aallartinneqanngilaq. Jyllandip avannaani kalaaliulluni inuuneq pillugu isiginnaagassiaassaaq, kalaallinillu isiginnaartitsisoqassalluni.

- Peqataarusuttunik apersuisussanngorpugut. Isiginnaagassiaq sumut attuumassuteqassanersoq sulissutigineqalissaaq. Taanna pereeriarpat sungiusarnerit aallartissapput, tassani isiginnaartitsisartut ilisimasaannik nassuiaaffigineqassapput. Nalunngilarput imaaliallaannaq isiginnaartitsisartunngortitsisoqarsinnaanngitsoq, taamaammat nalunaartunut oqaatigaarput isiginnaartitsivinngikkaluarlutik kisianni isiginnaartitsinissami peqataassasut, Aalborg Teaterimit Nicolei Faber oqarpoq.

Novembarimi takutinneqaqqaassaaq
- Paasissutissiinermi ataatsimiisitsinerit marluk nuanneqaat. Kalaallit assigiinngitsorujussuarmik misigisaqarsimasut peqataapput. Kisianni kalaaliupput Danmarkimi najugaqartut. Ilaat ajornartorsiuteqarnatik inuupput ilaalli aamma ajornartorsiuteqartuullutik, Nicolei Faber oqarpoq.

- Isiginnaartut tiguartinniarlugit isiginnaagassiami susoqalaaginnavittariaqarpoq, kisianni kalaallit oqaluutinngikkaluarlutik ilagiissinnaanerat qanoq takutinneqarsinnaava?

Kalaallit Danmarkimi najugaqartut qanoq ittuunerat takutinniarlugu isiginnaagassiortoqalerpoq.

Aalborg Teaterip aaqqissuisuata Jens Christian Lauenstein Ledip isiginnaagassiami ilitsersuisuussaaq. Isiginnaagassiaq novembarip 21-ani takutinneqaqqaassaaq, qaammammilu ataatsimi takutinneqaqattaassalluni.

Arctic Business Networkip aamma Sermitsiaq.AG-ip suleqatigiinneratigut allaaserineqartoq ilanngunneqarpoq. Arctic Business Network annertunerusumik uani atuaruk