Saturday, February 10, 2018 - 12:12

Kalaallit peqatigiiffiata kalaallit Fyn-imi katersorusuppai

Assimi takuneqarsinnaapput kalaallit peqatigiiffianni Umiami siulersuisunngortut
Assi.: Knud Fl. Larsen
Kalaallit peqatigiiffiiat Umiaq Odensemi Nordatlantisk Husimi ileqquusumik tallimanngornermi ilaasortaminut ataatsimeersuartitsivoq

Ilaasortarpassuit oqaluuserisassanut soqutiginnillutik oqalliseqataasut ataatsimeersuarnermi najuupput. Siulittaasunngorniuunneq aamma siulersuisunut qineqqusaarnerit arlalinnit qinigassanngortiffiupput.

Siulittaasuungallartoq siulittaasunngorpoq
Mina Lennert-Petersen, Umiarmi aasarli siulittaasuungallartoq, siulittaasutut nalunaaruteqarnermini peqatigiiffiup aaqqissuussat arlariit ingerlassimasai ilaatigut oqaluttuarai. Ukiorlu ataaseq kingumut qiviarlugu aaqqissuussinerpassuupput. Soorlu ilaatigut naalagiaqatigiinnerit, Umiap ukiunik 45-nngortorsiornera, Havnekulturfestival-imi peqataaneq, Inuiattut Ullorsiortitsineq, filmertitsinerit kiisalu juulleriartornerani aaqqissuussat allat.

Peqatigiiffiup erinarsoqatigiivi annertuumik ingerlatsisuupput, taakkua ukiup ataatsip ingerlanerani amerlasoorpassuariarlutik aaqqissuussani assigiinngitsuni erinarsortarsimammata.

Siulittaasumut qinersisoqarnerani Mina Lennert-Petersen taaneqarluarluni siulittaasutut qinerneqarpoq.

Aamma siulersuisunut ilaasortat arlallit qinigaaqqipput.

Aamma atuaruk: Odensemi Umiaq-mi ataatsimeersuarneq sivisooq

Siulersuisut nutaat
Siulersuisunngortut nutaat inissitsiternertalimmik suli ataatsimiinngillat, taamaammat siulersuisuni suli inissititerisoqanngilaq.

Siulittaasoq aamma aningaaserisoq immikkut qinerneqartarput. Mina Lennert-Petersen siulittaasutut qinerneqartoq, Emma Balslev aningaaserisutut qinerneqarpoq.

Cici Sterling, Johanne Christensen, Maren Lund, Emilia Rosbach aamma Lars Peter Sterling Umiap siulersuisuini ilaasortatut qinerneqarput.

Siulittaasup anguniagai
Ileqquusumik ataatsimeersuarneq naammassimmat Sermitsiaq.AG-ip Mina Lennert-Petersen sivikitsumik oqaloqatigaa. Taanna neriuuteqarpoq anguniaqarusullunilu siulersuisut suliassaannik:

-  Aalajangersimasunik sisamanik iliuuseqarusuppunga:

  • Kalaaleqativut Fyn-imi ataatsimoortinnerulernissaat
  • Umiaq piunera atorneralu paasititsiniutiginerulissavarput
  • Kalaallit kulturiat Danmarkimi ersarissassavarput

Naggataagullu, aamma minnerunngitsumik maani Danmarkimi Kalaallit Nunaata nutaaliaasup paasisitsiniutiginissaa suleqataaffigissavarput, Umiap siulittaasortaava, Mina Lennert-Petersen, naggasiivoq.

Aamma atuaruk: Umiaq 40'nik ukioqalersoq

Immikkut ataatsimeersuartoqassaaq
Ataatsimeersuarnermi peqatigiiffiup naatsorsuutai akuerineqanngillat. Taamaammat piffissami qaninnermi immikkut ataatsimeersuartitsinissamut aggersaasoqassaaq. Immikkullu ataatsimeersuarnermi peqatigiiffiup naatsorsuutaasa akuerineqarnissaat kisimi eqqartugassaassaaq.

Umiak 50-it misssaannik ilaasortaqarpoq. Ileqquusumik ataatsimeersuarnermut ilaasortat 36-it missaat peqataapput.

Seneste nyheder / Nutaarsiassat kingulliit