nersornaasiineq

Kalaallit ''Oscariannik'' Nuummi nersornaasiineq

Filminut soqutiginnittut tamarmik Nuummi Katuami arfininngorpat filmiliortut ukiumoortumik akissarsitinneqarnerinut qaaqquneqarput. Peqataaneq akeqanngilaq, danskillu filmiliaat marluk takutinneqassapput

Ulannaq Ingemann siorna piukkunnaateqarnini pillugu nersornaaserneqarpoq.

Kalaallit filmiliortut akissarsissutigisartagaat, Innersuaq, ukiut tamaasa filmiliortartut peqatigiiffiannit film.gl-imit nersornaasiissutaasartoq, nalunaaqutaq 17.00-mit aallartissasoq peqatigiiffik tusagassiuutinut nalunaarummi ilisimatitsivoq.

Siorna filmiliornermik piukkunaatilik Ulannaq Ingemann nersornaaserneqarpoq. Ukiormanna kina nersornaaserneqassanersoq arfininngorpat saqqummiunneqassaaq.

Nersornaat pillugu
Nersornaat ''filmiliortumut maanna saqqumilaartumut, inuuneq naallugu suliniuteqarsimasumut imaluunniit piukkunnaatilimmut'' tunniunneqartartoq, filmiliortartut peqatigiiffiata oqaluttuaraa.

Kalaallit Oscariat tunniunneqartartoq Peter 'Kujooq' Kristiansenimit ukkusissamik qiperugaavoq.

Nersornaasiineq Film.gl-ip ukiormanna filmiliornermuut pikkorissartitsineranut ''Talented Greenlandimut'' attuumassuteqarpoq. Suliniut peqatigiiffiup Nunatsinni filmiliornermut ilinniarfinngorluni suliaqarfinngorluniluunniit ineriartornissaa neriuutigisaraa.

Nersornaasiinermi aaqqissuisut filmiliornermi ilitsersuisoq qallunaaq Ole Christian Madsen, ''Talented Greenlandimut'' ilitsersuiartortillugu Nuummut tikisissimavaat, nersornaasiinermullu atatillugu filmiliornermi ilitsersuisartup filmiliai marluk ''Steppeulven'' 2014-imeersoq aamma ''Flammen & Citronen'', 2008-mi takuteqqaarneqartoq takutinniarpaat.

Qallunaaq filmiliornermi ilitsersuisoq nersornaasiinerup kingorna isiginnaartunit apersorneqarsinnaasoq ilisimatitsissutigineqarpoq.

Powered by Labrador CMS