Nunani tamalaani aaqqiagiinngissuteqarneq
Kalaallit Nunaata silaannartaa: Nunat tamalaaneersut Nunatta silaannatigoortarnerat Danmarkip qanoq aningaasarsiutigaa
Ruslandip pilersaarutigilerpaa russit silaannartaatigut nunat tamalaat timmisartuiussisarnerat killilersorniarlugu. Ilimagisariaqarpoq tamatuma kingunerissagaa timmisartut amerlanerusut nunatta silaannartaatigoortalernerat, Doris Jakobsen naliliivoq
Doris Jakobsenip nunanut allanut ministeri Martin Lidegaard apeqquteqarfigaa nunat tamalaat Kalaallit Nunaat qulaallugu nunattalu silaannartaatigut timmisartuussisarnerat pillugu.
Taamatut apeqquteqarneranut pissutaavoq Ukraine-mi aaqqiagiinngissuteqarneq pissutigalugu Kitaata Ruslandillu akornanni pissutsit. Tamatumani Kitaata Rusland sammisaqarfitsigut arlalitsigut aningaasarsiornikkut Rusland pillarniarpaa, maannalu Rusland akisilluni ilimasaarivoq nunat tamalaat Rusland qulaallugu russillu silaannartaatigut timmisartuussiarnerat killilersorniarlugu. Doris Jakobsen isumaqarpoq russit taamaasiorpata timmisartut nunatta silaannartaatigoortartut amerlerujussuassasut.
Taamaattumik Doris Jakobsen aperivoq: "Ministerip oqaatigisinnaavaa qanoq naatsorsuutigineqarnersoq Kalaallit Nunaata silaannartaata atorneqarnera qanoq kinguneqassanersut, Rusland nunat tamalaat timmisartunik russit silaannartaatigooqqusiunnerpaat, tassa tusagassiorfiit malilllugit russit naalakkersuisuisa taamaasiulernissartik isumaliutigimmassuk".
Doris Jakobsenillu nunatta silaannartaatigut timmisartorneq apeqqutigigamiuk aamma paaserusuppaa Kalaallit Nunaat qulaallugu timmisartorneq Danmarkip qanoq aningaasarsiutigitigineraa, aningaasallu Kalaallit Nunaanni sumut atorneqarnrsut.
Taamaattumik aperivoq: "Ministeriup eqqorluartumik oqaatigisinnaavaa Kalaallit Nunaata silaannartaanik nunat tamalaaneersut timmisartuisa qulaavaanerat maanna pisartoq Danmarkip qanoq aningaasarsiutigineraa, kiisalu qanoq upalungaarsimasoqarnersoq timmisdartut nunanit tamalaaneersut Kalaallit Nunaata silaannartaani timminerminni ajornartorsiulissagaluarpata".