Aalisarneq
Kalaallit Nunaata Savalimmiut imartaanni pisassani pigiinnassavai
Kalaallit Nunaat Savalimmiullu Kalaallit Nunaata Savalimmiut imartaanni aalisarnissaanut aamma Savalimmiut Kalaallit Nunaata imartaani aalisarnissaannut isumaqatigiissuteqarput.
Atorfilittatigoortumik Københavnimi ulluni marlunni isumaqatigiinniartoqareersorlu illuatungeriit isumaqatigiissutigaat maannakkut isumaqatigiissutaasoq aammattaaq 2018-imut atuuttussanngorlugu sivitsorneqassasoq. Namminersorlutik Oqartussat tusagassiuutinut nalunaarummi paasissutissiipput.
Saarullernartassiissutit
Tassa Kalaallit Nunaat 2018-imi Savalimmiunit saarullernanik 13.000 tonsinik pisassinneqarpoq, taamatullu Kalaallit Nunaat Savalimmiut imartaanni NEAFC-mut pisassiissutinit pisassaminik 7.515 tonsinik aammattaaq aalisarsinnaassasoq.
Taamaasilluni Savalimmiut Kalaallit Nunaata imartaani pisassatik pigiinnartussanngorpaat, kisitsisitigut takussutissat allaaserisap ataani takuuk.
Naammagisimaarnartoq
- Umiarsuaatillit Kalaallit Nunaanneersut namminersorlutillu inuussutissarsiortut sinniisui isumaqatigiinniarnernut peqataasut Aalisarnermut Piniarnermullu Naalakkersuisoqarfik peqatigalugu naliliipput Savalimmiunut aalisarneq pillugu isumaqatigiissut assut naammagisimaarnartoq, Namminersorlutik Oqartussat allapput.
Uumasut assigiinngitsut aggutaarneqarneri Namminersorlutik Oqartussat nittartagaanni takukkit