Nukissiorneq
Kalaallit Nunaata Savalimmiullu nukissiornikkut suleqatigiinnertik nukittorsarpaat
Kalaallit Nunaat aamma Savalimmiut mingutsitsinngitsumik nukissiornermut annertuumik anguniagaqarput
Pinngortitamut, Avatangiisinut Nukissiuuteqarnermullu Naalakkersuisoq, Mala Høy Kúko, sapaatip-akunnerani matumani Savalimmiunut tikeraarpoq.
Kalaallit Nunaata Savalimmiullu suleqatigiinnermut isumaqatigiissutaat tikeraarnermut tunuliaqutaavoq.
Kalaallit Nunaat Savalimmiullu mingutsitsinngitsumik nukissiornissamik pimoorussillutik anguniagaqarput. Nunat marluullutik 2030-mi mingutsitsinngitsumik nukissiornissaq kissaatigaat. Tassalu nukissiaq imermit, anorimit seqinermillu pissarsiarineqartassaaq.
Misilittakkat
- Savalimmiut aamma Kalaallit Nunaat ataatsimoorlutik unammilligassarpassuaqarput. Assersuutigalugu nunani marluusuni silap pissusii ilaanneeriarlutik sakkortusarput, tamannalu inuiaqatigiit qanoq ilusilerneqarnissaannut annertuumik aalajangiisarpoq – taakkununngalu nukissiuuteqarneq ilaavoq. Taamaattumik misilittakkanik avitseqatigiinnissarput akunnitsinnilu ilinniarfigeqatigiinnissarput isumatusaarnerulluartussaavoq, taanna tusagassiuutinut nalunaarummi oqarpoq.
Taanna anguniakkap qanoq ililluni piviusunngortinneqarsinnaaneranut isumassarsiorniarluni tikeraarpoq. Savalimmiut ilaatigut anori atorlugu nukissiornermi tamatumalu kingorna anori atorlugu nukissiamik toqqorterisarnermi misilittagaqarluarput.
Anguniakkat annertuut
- Innuttaasut eqqarsaatigalugit nunaarannguuvugut, taamaakkarluartorli anguniakkavut suliattalu inerneri annertusinnaapput, Mala Høy Kúko erseqqissaavoq.
Naalakkersuisut siulittaasuata Kim Kielsenip (S) 2016-imi apriilimi Savalimmiuni Lagmandi Aksel V. Johannessen suleqatigiinnissamut isumaqatigiissummut atsioqatigaa. Suleqatigiinnissamut isumaqatigiissut malillugu nunat taakku marluullutik nukissiornermi avatangiiseqarnermilu suleqatigiinneq ineriartortissavaat nukittorsassallugulu.