Camp Century
Kalaallit Nunaata Danmarkillu akornanni ajornartorsiorneq
Oqaatsit kusanartut, iliuutsilli annikitsut. Vittus Qujaukitsup FN-mut unnerluussiniarnini suli sioorasaarutigaa
Danskit nunanut allanut tunngasunut ministeriata Kristian Jensenip (V) Nunatsinnut tikeraarnerani angusaqartoqarpallaanngilaq. Nunanut allanut tunngasunut naalakkersuisup Vittus Qujaukitsup, aamma danskit ministeriata ullumikkut tusagassiortunik katersortitsinerat nutaartaqarpallaangilaq. Pisoq artornartuusoq marluullutik nassuerutigaat.
- Kristian Jensen unneqqarissumik oqaloqatigaara, tamannalu suli naammassinngilaq, Vittus Qujaukitsoq tusagassiortunik katersortitsinerup kingorna oqarpoq.
- Kalaallit Nunaata Danmarkillu akornanni pisoq suliamut tunngatillugu aarlerinartortaqarpoq, ingammik suliaq Thule Air Basemut tunngasoq naammassineqanngitsoq aamma Camp Century, taanna oqarpoq.
- Ajornartorsiutip qanoq annertutigineranut pisoq ingerlariaqqinnaveerfiusumut aaqqiissutissamik nassaartoqarsinnaanera apeqqutaavoq. Suliaq Kalaallit Nunaata Danmarkillu akornanniinnaanngilaq, USA-mi aamma suliami aalajangiisussatut apeqqutaallunilu peqataavoq, Vittus Qujaukitsoq oqarpoq.
Isornartorsiuineq
Aggusitimili sakkutooqarfiusumi Camp Centurymi sermip ataani mingutsitsisoqartoq saqqummiunneqarmat, kalaallit politikerit arlallit suliap ingerlanera isornartorsiornikuuaat.
Tusagassiortunik katersortitsinermi Kristian Jensenip neriorsuutigaa, Kalaallit Nunaat peqatigalugu Pituffimmut kiffartuussinermut isumaqatigiissut inissinniarlugu tuaviornerpaamik Amerikamiut pisortaqarfiat attaviginiarlugu.
Sakkutooqarfimmi suliassat Amerikamiut ingerlatseqatigiiffiisa suliarisarnissaat illersornissamut isumaqatigiissutit siunertarinngikkaa, taanna isumaqarpoq.
Danskit kalaallillu ingerlatseqatigiiffiisa suliassat suliarisassagaat aamma Kalaallit Nunaannut akileraarutitigut isertitanik aammalu suliffissanik praktikkerfissanillu qulakkeerinnittarnissaat pingaartuteqartoq, Kristian Jensen isumaqarpoq.
Trump sioqqullugu
Sapaatip-akunnerini aggertuni Amerikamiunut taanna attaveqareerniarpoq. Amerikamiut præsidentitaavat januaarimi atuutsilerneqannginnerani apeqqut tamanna paasineqartariaqartoq taanna isumaqannguatsiarpoq.
- Donald Trump aallartikkuni ulapittussaavoq, naatsorsuutigaaralu taassuma pisortaqarfiataluunniit suliamut taama annikitsigisumut aalajangiinissaminnut piffissaqarnavianngitsut. Allarpassuit tamanna malunnaateqartinngitsuussavaat. Maannamut oqariartuuteqartarneri naapertorlugit taassuma Issittumut politikkia ilisimanngilarput, kisianni illersornermut isumannaatsuunissamullu politikkimut tunngatillugu USA-p peqatigisai ataatsimut illersornermut suliniuteqarnerunissaat kissaatigalugu oqaatiginikuuaa.
Kalaallit Nunaanni sakkutooqarfimmut USA akiliissanngitsoq, Kristian Jensen aamma isumaqarpoq. Illuanilli Nunatta Danmarkillu Amerikamiut najuunnerat nuannaarutigissagaa isumaqarpoq.
Illersornissamut isumaqatigiissut 1951-meersoq allanngortinnissaanut suliniuteqarnissannut pilersaaruteqarpit?
– Pilersaaruteqanngilanga, taanna oqarpoq.
Inatsisartut
Inatsisartut sisamanngornermi Pituffik oqallisigeqqammerpaat. Amerikamiut sakkutuuisa Nunatsinniinnerat annerpaamik pissarsiffiunissaa aamma iluaqutaanissaa qulakkeerniarlugu, Naalakkersuisut danskit/kalaallit ataatsimoorlutik USA-mut isumaqatiginninniarnissamut sulissuteqarnissaat tassani isumaqatigiissutigineqarpoq.
Naalakkersuisut Illersornissamut Isumaqatigiissut 1951-imeersoq tamatumalu kingorna tapiliunneqartut naapertorlugit USA-p Nunatsinni suliaqartarnerini nunatsinnut erseqqissunik iluaqutaanissaa suli sulissutigissavaat, tassunga ilanngullugu amerikamiut sakkutooqarfikui sanaartukkallu allat qimaannarneqarnikut pillugit avatangiisitigut akisussaaffiup paatsuugassaanngitsumik inissinneqarnissaa, pisariaqarpallu tapiliussamik nutaamik isumaqatigiinninniarnermik imaluunniit Illersornissamut Isumaqatigiissutip 1951-imeersup isumaqatiginninniutigineqaqqinnissaanik piumasaqaateqarlutik, Inatsisartut aalajangiineranni tamanna atuarneqarsinnaavoq.
Kisianni Illersornissamut Isumaqatigiissut 1951-imeersoq isumaqatiginninniutigeqqinnissaanut Kristian Jensen aallarnisaaqataarusunngilaq.
Akisussaaffik assortuussutaasoq
Avatangiisit iluarsartuunneqarnissaannut kina akisussaasuunersoq, imaluunniit sakkutooqarfiusimasumi Camp Centurymi mingutitsineq paasisaqarfiginissaanut qanoq sukkatigisumik paasiniaasoqarnissaanut aamma isumaqatigiissutigineqanngilaq.
Atuaruk: Camp Centurymi mingutsitsineq pillugu USA-mut suli attaveqartoqanngitsoq
Danskit naalakkersuisuisa akisussaaffik inissinneqarnissaa sulissutigissagaa, Kristian Jensenip neriorsuutigaa.
Malersugassartaqanngitsoq
Akisussaaffiup inissinneqarnissaa Vittus Qujaukitsup piumasaraa, aammalu piaarnerpaamik Camp Centurymi iluarsaassisoqarnissaa, akuutissat ulorianartut atortunit qimaannakkanit anianissaat ulorianartorsiortitsineri pissutigalugu. Sumiiffimmi aalisartut piniartullu tamatuma ulorianartorsiortissinnaavai.
Tusagassiortunik katersortitsinermi Vittus Qujaukitsup aaqqiagiinnginneq pissutigalugu FN-mut unnerluussinissaminik sioorasaarinini attatiinnarpaa. Illuanik Kristian Jensenip sioorasaarineq itigartippaa.
- Avatangiisit qulakkeerniarlugit pisinnaasatsinnik iliuuseqarpugut. Malersugassaqanngilaq, taanna oqarpoq.