toqqaaneq
Kalaallit Nunaata Bruxellesimi Mininnguaq sinniisorissavaa
Cand. mag. Mininnguaq Kleist Bruxellesimi sinniisoqarfimmi pisortatut toqqarneqarpoq
Nunanut Allanut Pisortaqarfik aalajangerpoq cand.mag. Mininnguaq Kleist Bruxelles-imi sinniisoqarfimmi pisortatut atorfinitsinniarlugu.
Sinniisoqarfimmi pisortatut atorfik ulloq 1. april 2016 inuttaaruppoq, tassami Lida Skifte Lennert ulloq taanna Københavnimi sinniisoqarfimmi pisortanngorluni atorfinimmat.
Namminersorlutik Oqartussat tusagassiuutinut nalunaarummi taama allapput.
Atuaruk: Aajuna Københavnimi sinniisoqarfimmi pisortaq nutaaq
Misilittakkat
Mininnguaq Kleist 2013-imi septembarimili Naalakkersuisut Siulittaasuata Naalakkersuisoqarfiani pisortatut sulivoq. Tamanna sioqqullugu Mininnguaq Kleist-ip Nunanut Allanut Pisortaqarfimmi immikkoortortaqarfimmi pisortatut aamma allaffimmi pisortatut atorfeqartarpoq.
Tamatuma saniatigut Mininnguaq Kleist 2007-2009-imi taamanikkut Naalakkersuisut siulittaasuata allattoqarfiani namminersornermut allaffimmi immikkoortortaqarfimmi pisortatut atorfeqarpoq.
Pisortatut atorfimmut qinnuteqaatit pingasut tiguneqarput, Namminersorlutik Oqartussat ilisimatitsipput.