Kalaallit Nunaata Arctic Winter Games-imik aaqqissuisuuneq tigussavaa

Fairbanks-imi Arctic Winter Gamesip naggataarnersiorneranut atatillugu Kommuneqarfik Sermersuup borgmesteriata Asii Chemnitz Narupip illoqarfik aaqqissuisuusussaq – Host City – sinnerlugu AWG 2016-imut aaqqissuisuunissaq tigussavaa. Illoqarfittut aaqqissussinermi akisussaaffik Asii Chemnitz Narup-ip saniatigut ilinniartitaanermut, kultureqarnermut, ilageeqarnermut naligiissitaanermullu naalakkersuisumik Nick Nielsen-imik aamma Kalaallit Nunaanni sulisitsisut peqatigiiffianni siulittaasumik Henrik Leth-imik ilaasortaqarpoq.

Aaqqissuussinerup tigunissaa tulluusimaarnartoq
- AWG 2014-imi peqataaneq misigisaavoq imaannaanngitsoq, aammalu tulluusimaarnaqaaq 2016-imi Arctic Winter Games-imut akisussaaffik tigusussanngorlugu. Nunatsinnut aammalu Nuummut Arctic Winter Gamesimik ingerlatsiffiusussamut misigisaassaaq imaannaanngitsoq Issittormiut Nuummi katersuunnissaat, Asii Chemnitz Narup oqarpoq.

- Maannamiit 2016-imi marsip tungaanut piareersaatigut annertusiartortinneqassapput. Arctic Winter Gamesimik aaqqissuussisuuneq Nuummut aammalu nunatsinnut tamarmut piginnaasaatigut qaffassaanissamut, nammineq piumassutsimik suliniutinik ingerlatsisuusarnerup nukittorsarnissaanut aammalu kommunit, Namminersorlutik Oqartussat, suliffeqarfiit innuttaasullu suleqatigiittarnerisa nutarteriffiginissaannut periarfissiilluassaaq, Kommuneqarfik Sermersuumi borgmesteri tusagassiutinut nalunaarummi oqarpoq.

Illoqarfittut aaqqissuisuunissami takorluukkat aamma naleqartitat sisamanngornermi marsip ulluisa 20-anni Fairbanks-imi ilasseqatigiissitsinermi saqqummiunneqassapput.

- Issittormiut AWG-mi unammiuaaqatigiittarneranni siunertaasoq pingaarneq soorunami tassaavoq timersorneq, kulturi aammalu issittormiut inuusuttaasa nunani killeqarfiit akimorlugit naapisimaaqatigiittarnerat. Kisiannili AWG aamma Kalaallit Nunaannut periarfissatsialaavoq imminut ussassaarutiginissamut, aammalu takutitsinissamut ataatsimoorluta suliniutinik angisuunik kivitseqatigiissinnaasugut. Ilasseqatigiissitsinerullu siunertaraa issittumi ikinngutigut tusagassiortullu 2016-imi Arctic Winter Gamesertoqarneranik eqqaasissallugit, minnerunngitsumillu Kalaallit Nunarput ilisaritissallugu, naalakkersuisoq Nick Nielsen oqarpoq.

Naggataarnersiorneq KNR-ikkut takutinneqassaaq
Asii Chemnitz Narup aamma Nick Nielsen ilasseqatigiinnermut qaaqqusisutut ataatsimoorlutik qaaqqusaminnut tikilluaqqusipput. Aqutsisoqatigiinni siulittaasoq, Christian Keldsen, aamma General Manager, Maliina Abelsen, tamatuma kingorna AWG 2016-imut pilersaarutinik takorluukkanillu saqqummiussipput. Ilasseqatigiinnermi AWG 2016-ip nittartakkami quppernissaa siullermeersumik ilisaritinneqarpoq, soorluttaaq maskotti unammiuaarnissanilu oqaasinnaassaq aamma qaaqqusanut ilisaritinneqarluni.

Visit Greenland saqqummersitsiveqarluni tikilluaqqusivoq nunattalu issittormiut sinniisaannut allanut tusagassiortunullu ilisaritinneqarnerani peqataalluni. Kimmernaq, Malik Hegelund Olsen aamma Adam Kjeldsen namminneq nipilersorlutik erinarsorlutillu aliikkusersuipput.

- Fairbanks-imi ataatsimoorluta misigisatta 2016-imi AWG-mut suleqatigiilluta pitsaasunik aallaavissaqartilerpaatigut siunissamilu ataatsimoorussamik suliassatsinnut pitsaasumik tunngavissaqartilerluta, Asii Chemnitz Narup aamma Nich Nielsen oqarput.

Arctic Winter Games 2014 Fairbanksimi ingerlanneqartumi arfininngorpat naggataarnersiornerani KNR TV 1-ikkut toqqaannartumik takutinneqassaaq nalunaaqutaq 23.00-imit 24.00-ip tungaanut.

Arctic Winter Gameqarnera pillugu allaaserisat allat aamma takukkit