københavnimi pisussaq
'Kalaallit Nunaat Tivolimi' tusaamasamik nipilersortussamik saqqummiisoq
Erinarsortartoq tusaamaneqarluartoq qallunaaq Kalaallit Nunaat Tivoleqarnerani tusarnaartitsissaaq
Kalaallit Tivolimi aggustusip aallaqqaataani naapisimaarnissaat ukioq manna tallimanngornermi ingerlanneqassaaq, tassani qallunaamik tusaamasamik ukioq manna appittoqassaaq. Aasami tallimanngornerni Tivolimi aamma 'tallimanngornermi rock'-erfittut taallugu tusaamasanik appisimaartoqartarpoq.
- Tivoli suleqatigalugu tusarnaartitsisussamik nassaarpugut, taannalu aaqqissuussinernut assigiinngitsunut tulluartuuvoq. Lis Sørensen Danmarkimi nunatsinnilu nuannarineqarluarpoq. Lis Sørensen 2012-imi Katuami tusarnaartitsivoq, inuillu ulloq manna tikillugu tusarnaartitsinera oqaluuserisarpaat. Aggustusip aallaqqaataani Lis Sørensenip tusarnaartitsinissaa qilanaaraarput, 'Kalaallit Nunaat Tivoli'-mi aaqqissuisoq Miki Jensen tusagassiutinut nalunaarummi oqarpoq.
Lis Sørensen ukiuni kingullerni 30-ni tusarnaartitsisarnermigut nuannarineqarluarpoq, atugaasa ilaat soorlu: 'Tæt på Ækvator’, ’Mine Øjne De Skal Se’ kiisalu ’Stille før Storm’ tusaamaneqaatigalugit.
'Kalaallit Nunaat Tivolimi' 2014-imi ingerlanneqartussaq ukioq kingullerli pilersaarusiorneqalerpoq, naammassisassat kingulliit piareeriarpata ulluni taakkunani susoqarumaarnersoq nalunaarutigineqarumaarpoq.