assammik arsarneq

Kalaallit Nunaat siullermeerluni unamminermini ajugaavoq

Angutit assammik arsarlutik Amerikap Nunavissuani Pissartanngorniunneranni kalaallit arfininngormat Canada qularnaatsumik ajugaaffigaat

2014-imi Amerikap Nunavissuani Pissartanngorniunnermi, Uruguaymi ingerlanneqartumi, ammaanersiornermit assi

Assammik arsarluni Amerikap Nunavissuani pissartanngorniunnermi, Argentinami Buenos Airesimi ingerlanneqartumi, kalaallit siullermeerlutik unammigamik minutsit 30-t marloriarlugit ingerlanneqareersut 31-24-mik ajugaapput.

Unammineq aquppaat

Kalaallit minutsini 60-ini tamani unammineq aquppaaat. Minutsit qulingiluat ingerlariiginnartut Kalaallit Nunaat 6-1-imik siuarsimavoq. Kalaallillu unamminermik tigumminninnerat ingerlaannarpoq. Kalaallit 13-7-mik siuarsimariarlutik muminnermi 16-10-mik siuarsimapput.

Nunanut allanut unammisartut sungiusaasuata Niels Møllerip unamminerup immikkoortuata siulliup affaani kingullermi Minik Dahl Høegh uninngatippaa.

Unamminerup immikkoortuata aappaa

Kalaallit kakkattortaasa Minik Dahl Høeghip Akutaaneq Kreutzmannillu bænkimi uninngatinneqarneranni Canada qanilligaluttuinnarpoq. 18-15-imik qanillisut Akutaaneq Kreutzmann isertinneqaqqippoq, taavalu kalaallit siuariartoqqilerput, 26-21-mut, 30-23-mut kiisalu naggataatigut 31-24-mik ajugaallutik.

Aallartilluarneq

Nunanut allanut unammisartut sungiusaasuata Niels Møllerip unammineq naammagisimaarpaa, minnerunngitsumik unammillaqqinnerpaat ilaat sipaarneqarmata.

– Unammiuaarneq ajugaanermik aallartillugu nuanneqaaq. Unammisartut tamarmik avalatsinneqarput. Unammiuaarneq sivisusussaavoq, taamaattumik nuannaarutigaata Canadamut unamminitsinni ingerlalluaratta angusarissaarlutalu, Niels Møller oqarpoq.

Kalaallit isertitsisui

Kalaallit isertitaat 31-it unammisartunit 11-nit isertinneqarput:
Minik Dahl Høegh, 6
Akutaaneq Kreutzmann, 5
Milan Olsen, 4
Aqqalu Ingemann, 4
Lars Møller, 3
Inujuk Ostermann, 3
Miki Heilmann, 2
Mussa Ostermann, 1
Lars O. Lyberth, 1
Nuka Heilmann, 1
Karl F. Frederiksen, 1

Ilimagisat ajugaapput

Kalaallit Nunaata pulje-ni allanik marlunnik unammisoqarpoq, taakkunanilu ilimagisat ajugaasarput. Argentinap Guatemala 37-12-mik ajugaaffigaa, Chilellu Mexico 30-21-mik ajugaaffigalugu.

Unamminerit pingasut

Gruppip aappaani unamminerit pingasut ingerlanneqarput: USA - Puerto Rico 26-31, Uruguay - Columbia 33-11 aamma Brasilia - Paraguay 54-14.

Unammisassaq tulleq

Kalaallit Nunaata sapaatiuppat ualikkut nunatta nalunaaqutaa malillugu nalunaaqutaq 16.00 unamminissamini tullermi Mexico unammissavaa. Ataasinngorpallu unamminissami pingaarnermi Chile unammissallugu.

Unammiuaarneq sivisooq

Unamminerit siulliit pingasut ingerlanneqareerpata pingasunngorneq qasuersaarfiussaaq. Sisamanngorpat tallimanngorpallu Kalaallit Nunaata puljemi unamminissamini kingullerni marlunni unammissavai Argentina aamma Guatemala.

Tamatuma kingorna sapaatip akunnerata naanerani krydskampit finalillu ingerlanneqassapput, unamminerillu taakkua aalajangiisuussapput Amerikap Nunavissuani Pissartanngorniunnermit angusarissaarnerpaat pingasut kikkut aappaagu januaarimi Frankrigimi VM-eqarnissaanut anngutissanersut.

Powered by Labrador CMS