Kalaallit Nunaat periarfissat nunagaat

Aleqa Hammond maanna Londonimut ingerlavoq. Marlunngorpat nunarsuarmi atuagassiat ataqqineqarnerpaartaasa ilaat, The Economist, Issittoq pillugu ataatsimeersuartitsissaaq ´Arctic Summit 2014´, tassanilu pingaarnerusutut oqalugiartuussaaq Naalakkersuisut siulittaasuat Aleqa Hammond, Siumut.
Siulittaasup oqalugiarnermini Kalaallit Nunaat nittarsaanniarpaa.
– Oqalugiaatissara suli naammassinngilara, Aleqa Hammond Sermitsiaq.AG-mut oqarpoq.
Taassuma oqaatigaa oqalugiaatigissallugit Kalaallit Nunaanni piiaaffeqarnermi aatsitassarsiornermilu periarfissat.
– Tusagassiortut nunanit tamalaaneersut aatsaat taama amerlatigissapput. Atuagassiat angisuut tusagassiorfiillu allat tusagassiortorpassuinit saaffigineqarsimavugut. TV-mi radio-milu kiisalu aviisini naqitani apersorneqarnissat aaqqissuunneqarsimapput, Naalakkersuisut siulittaasuat oqaluttuarpoq.

BBC-mi ´Hard Talk´-imi
Aleqa Hammond aamma BBC-p talkshow-iata ´Hard Talk´-ip, nunarsuaq tamakkerlugu aallakaatinneqartartup, Londonimi studiaanut qaaqquneqarsimavoq. Tassani arnap issittumi naalakkersuisut siulittaasuata akunnerit marlussuit atorlugit BBC Radio-mut aamma Hard Talk-imut immiunneqassaaq.
Aamma Reuters-imit, Financial Times-imit, The Times-imit China Business-imillu tusagassiortut Naalakkersuisut siulittaasuannik apersuinissaminnut immikkut piffissalerneqarsimapput.
Ataatsimeersuarnermi Arctic Summit-imi, immikkut Kalaallit Nunaannik samminnittussami, aamma Hans Christian Olsen, NunaOil-imeersoq, Graeme Hossie London Miningimeersoq kiisalu qallunaat issittumi ambassadøriat Erik Vilstrup Lorenzen saqqummiussissapput.
Londonimi ataatsimeersuarnermi aamma Sverigemit, Islandimit, Norgemit Canadamillu oqalugiartoqassaaq.