sanaartorneq
Kalaallit Nunaat naammattumik soqutiginanngilaq
Sanaartornermik suliallit Kalaallit Nunaanni sanaartornermut nunanit allaniit sulisussarsiorneq ajornakusoortippaat
Nuummi pineqaatissinneqarsimasunut inissiisarfissaq 2015-imi 2016-imilu sulisussanik amigaateqarnermik, siorna ukiorlunneranik sanaartornermilu teknikkikkut ajornartorsiuteqarnermik peqquteqartumik suli qaammatinik arfinilinnik kinguaattooqqissaaq.
Sanaartornerup kinguaattoortarnera Kalaallit Nunaanni nalinginnaasuuvoq. Amerlanertigullu sulisussanik amigaateqarneq peqqutaasarpoq. Taamak oqaluttuarpoq sanaartornermut suliffeqarfimmi Permagreenimi pisortaq Preben Kold Larsen, pineqaatissinneqarsimasunut inissiisarfissamik sanaartortuusoq, Sermitsiaq allappoq.
Kissaatigigaluaqaa suliffeqarfiit nunap avataanut sulisussarsiortarnerisa ajornannginnerunissaa
– Suliassarpassuit takkussuukkaangata Kalaallit Nunaanni sulisussat naammanneq ajorput. Nunallu avataanut sulisussarsiortarnermi annertuumik ajornartorsiuteqartarpugut. Assersuutigalugu Nunat avannarliit avataannut betonilerisinnaasumik sanasumilluunniit aallissagutta nunat allanut kiffartuussivik aqqusaaqqaartussaavarput, Namminersorlutillu Oqartussat apeqqusertarpaat sulisussaq pisariaqarnersoq, Preben Kold Larsen Sermitsiamut oqarpoq.
Taamaalilluni allaffissornermik sulinermi qaammatit pingasut-sisamat ingerlasinnaasarput, taamaalineranilu pineqartoq suliffittaareersimasarpoq.
Allaaserisaq tamakkerlugu Sermitsiami atuaruk. Aviisi uani pisiariuk: