oqallinneq
Kalaallit Nunaat naalagaaffinngunngisaannassaaq
Søren Espersenip Kalaallit Nunaanni politikki soqutigisarilluarpaa. Aqutsinerli aamma isornartorsiortuaannarpaa. Politikeri pillugu AG allaaserisaqarpoq
Aappaagunut aningaasanut inatsisissap Inatsisartuni oqaluuserineqaleruttornerani Danmarkimi Folketingimut ilaasortaq Søren Espersen, Dansk Folkepartiimeersoq, nipituulioqataavoq.
Taamaasiorpoq ataqqinninninngitsutut pasillerneqartuaraluarluni – Taamatulli pasillerneqarnini politikeritoqqap 'eqqunngitsumik politikkersortuaannartup' Espersenip quianaannartutut isigaa – Taamaasiorporlu aali qallunaat politikeriisa oqaatigineqarneq ajortumik ileqqorigaluaraat kalaallit namminneq oqartussaaffiinut oqaaseqartassanatik.
Aviisit, netaviisit, facebookimi quppernerit politikkimillu saqqummiussisarfiit allat sukkasuumik misissoraanni takuneqarsinnaavoq Søren Espersen qallunaani politikerini kisiartaapajaarluni taamaasiortartoq: Pissutsinut, nunatsinni Danmarkimilu kalaaliinnavinnut tunngasutut isigineqartunut akuleruttartoq.
Kingullermik paragraf 20 naapertorlugu qallunaat Naalakkersuisuinut peqqusaarutinik qulingiluanik apeqquteqarluni, apeqqutigigamiuk Namminersornermut inatsimmi oqaatsit 'inuiaat kalaallit' qanoq nassuiarneqassanersoq, aammalu qallunaat akulerunnissaannut periarfissaqarnersoq, kalaallit oqartussaasui kukkussuteqaraangata.
Aningaasaqarniarneq ajorluinnarpoq, taanna oqarpoq. Isumaginninnermik sulineq ingerlanerlioqaaq, taanna oqarpoq – Kalaallit Nunaallu, pingaartumik sammisaqarfiit ilaatigut nakkutigineqalertariaqarpoq, annertunerusumik namminersortinnagu.
– Aningaasaqarniarneq eqqarsaatigalugu isumaqarpunga tamanna ajorluinnartuusoq. Ukioq mannaannaanngitsoq, ukiulli tamaasa 70-80 milioner koruuninik amigartooruteqarlutik ingerlatsiniarput, piffissamullu sivisuumut aaqqiissutissarsioruminaatsitsillutillu aaqqissuusseqqinnissanut piumassuseqanngillat, Søren Espersen aningaasanut inatsisissatut siunnersuummik isumaqatigiinniarnerit pillugit oqarpoq.
Allaaserineqartoq tamaat aviisimi AG-mi sapaatip akunnerani matumani saqqummersumi atuarneqarsinnaavoq. Aviisi uani pisiariuk: