Kalaallit Nunaat Kinallu aalisarneq aatsitassarsiornerlu eqqartorpat

Kinap Danmarkimi ambassadørertaava Liu Biwei Kalaallit Nunaanni tikeraarpoq, Naalakkersuisut politikki tunngatillugu oqaloqatigissallugu. Kalaallit Nunaat Kinalu niueqatigiinnermi, misissuinerni, takornarialerinermi aningaasaliinernilu suleqatigiinnerat annertusineqarsinnaanerat naatsorsuutigineqarpoq.

Kinap ambassadøria aggustip 13-anit 17-at ilanngullugu Kalaallit Nunaanniissaaq, ulluni taakkunani ilaatigut Naalakkersuisut siulittaasuat Aleqa Hammond Siumut aamma aatsitassarsiornermut naalakkersuisoq Jens-Erik Kirkegaard ataatsimeeqatigissavai.

Suleqatigiinneq ineriartorfiusoq
Kinap aningaasaqarnera annertusiartuinnarpoq ukiuni kingulliunerusuni.

- Piffissami immikkut ittumi, Asiamut Kinamullu attaveqateqarnitta nutaamik pissanganartumillu ineriartornerata nalaaniittumi Kinap aallartitartaavata maanga tikilluaqqusinnaanera nuannaarutigaara, Aleqa Hammond ataatsimeeqatigeereernermi oqarpoq.

Kina Issittumi Siunnersuisooqatigiivisa ataatsimiittarnerinut aamma malinnaasarpoq.

- Neriuppunga, Kinap aallartitaa nutaaq peqatigalugu attaveqaatitta suli annertunerusumik ineriartorteqqissinnaassallutigu, ingammik niueqatigiinnerup, takornariaqarnerup, ilisimatusarnerup aningaasaliinerullu tungaatigut, Kinap Nunattalu tamarmiullutik imminnut neqeroorfigeqatigiiffigisinnaasaat, Naalakkersuisut siulittaasuat oqarpoq.

Taassuma saniatigut aallartitap nutaap aamma Ilisimatusarfik, Pinngortitaleriffik Royal Greenlandilu pulaassavaat.

Assit ataani takukkit