ilisimatusarneq
Kalaallit Nunaat Issittumi ilisimatusarnermi qitiuniarpoq
Issittumi ilisimatusarneq ineriartupiloorpoq. Sermersuup aakkiartornera ilutigalugu nunarpassuit Issittumi ilisimatusarnertik annertusiartorpaat. Namminersorlutik Oqartussat tamanna atorluarniarpaat.
- Nunat angisuunik taasartakkavut soorlu USA, Rusland, Kina, Japan, Europamilu nunat arlariit issittumik ilisimatusarnertik ukiuni kingullerni annertusiartortiinnarnagu nunat pineqartut immikkut ingerlaasissaminnik aalajangersaanerulersimapput kiisalu suleqatigiiffigisinnaasaminnik naaperiaasarneq pingaarnerulersikkiartorlugu.
Naalakkersuisoqarfiup Nunatsinni Ilisimatusarnikkut isaariaqalersinnaanissaa (ForskningsHUB) misissorlugu aallartissimavaa, taanna Issittumi ilisimatusarnermi qitiulersinnaavoq.
Issittumut tunngatillugu ilisimatuussutsikkut paasisanik siammarterisarnermi Kalaallit Nunaat qitiulersinnaanersoq aamma misissorneqassaaq.
Aqagu marlunngornermi ilisimatusarnermi isaaffimmik (HUB) pilersitsinissaq isumasioqatigiinnermi eqqartorneqassaaq nunani allani tamakkuninnga ilisimasallit saqqummiisoralugit, sisamanngorpallu ilisimatusarnermi paasisanik innuttaasunut apuussuisarneq aallarnisarlugu sammisaqartitsisoqassaaq. Aaqqissuussat tamarmik Hotel Hans Egedemi pissapput.