Kalaallit Nunaannut ataatsimiititaliami Venstremeersoq siulittaasunngorpoq

39-nik ukiulik Marcus Knuth Folketingimi Kalaallit Nunaannut ataatsimiititaliaani siulittaasussatut toqqarneqarpoq. Ataatsimiititaliami siulittaasunngornissani qinnuteqaatigisimavaa.

- Ataatsimiititaliami siulittaasunngornera nuannaarutigeqaara, Venstremeersoq Marcus Knuth Sermitsiaq.AG-mut oqarpoq.

Kalaallit Nunaannut politikkikkut misilittagaqanngilaq, kisianni angaa Eigil Knuth Kalaallit Nunaanni ukiorpassuarni ilisimasassarsiortooreerpoq.

- Kalaallit Nunaannut soqutiginninnera pissutigalugu siulittaasussatut qinnuteqaateqarpunga, Marcus Knuth oqarpoq.

Danskit ilisimasaqarnerulernissaat
- Kalaallit Nunaat Danmarkilu ataqatigiinnerulernissaat sulissutigineqartariaqarpoq, aamma danskit Kalaallit Nunaannut ilisimasaqarnerulernissaat sulissutigineqartariaqarpoq, politikkeri oqarpoq.

- Soorunami Kalaallit Nunaanneereerpunga, takoqqinnissaa aamma qilanaaraara.

Ataatsimiititaliami ukiuni kingullerni 20-ni kalaallimit siulittaasuuffigineqartarpoq. Inuit Ataqatigiit ataatsimiititaliami siulittaasuutitaqaraluarpoq qinersinerup siuliani.

Oqaluttuassartaa
Siumumit Hans Pavia Rosing 1990-mit 2001 tikillugu ataatsimiititaliami sulittaasuuvoq. Inuit Ataqatigiinnit Kuupik Kleist 2001-mit 2006 ilanngullugu siulittaasuuvoq. Sara Olsvig 2001-mit 2014-mut siulittaasuuvoq, taannalu pereermat Johan Lund Olsen siulittaasuulluni. Taakku Inuit Ataqatigiinneersuupput.

Kalaallit Nunaannut ataatsimiititaliami Aleqa Hammond siulittaasup tulliatut inissippoq kiisalu Inuit Ataqatigiinnit Aaja Chemnitz Larsen ilaasortaalluni.