Kalaallit Nunaannut ataatsimiititaliaq
Kalaallit Nunaannut Ataatsimiititaliami siulittaasunngorniunneq
Søren Espersen isumaqarpoq IA-p Siumullu iligiit saamerliit oqaloqatigiissagaat, Folketingimi Kalaallit Nunaannut Ataatsimiititaliami siulittaasuuffik pissagunikku
– Kalaallit ilaasortat saamerliupput Helle Thorning-Schmidtilu, Socialdemokraterne, ministeriunissatut tikkuarsimallugu, taamaattumik Kalaallit Nunaannut Ataatsimiititaliami siulittaasuuffik perusukkunikku Socialdemokraterne oqaloqatigissavaat.
Taamatut Sermitsiaq.AG-mut oqarpoq Dansk Folkepartip siulittaasuata tullia ukiorpassuarnilu Kalaallit Nunaannut Ataatsimiititaliami ilaasortaasimasoq Søren Espersen.
– Siulittaasuuffik isumaqatigiinniutigineqarpoq, Espersen erseqqissaavoq.
– Inatsiseqanngilaq oqartumik Kalaallit Nunaannut Ataatsimiititaliami siulittaasuuffik pinngitsoorani kalaallimik folketingimi ilaasortamik inuttalerneqassasoq, taanna oqarpoq.
Tunniunnianngilaat
– Siulittaasuuffik kalaallimut folketingimi ilaasortamut ingerlateqqinnianngilarput. Kalaallit folketingimi ilaasortat Kalaallit Nunaannut Ataatsimiititaliami siulittaasuuffik perusukkunikku Socialdemokratinut saaffiginnissapput, uagutsinnut talerperlernuunngitsoq, Søren Espersen tikkuaavoq.
– Kalaallit Nunaannut Ataatsimiititaliami siulittaasunngussavit?
– Tamanna naluara, tassa udenrigspolitisk nævn-imi siulittaasoorusunnerugama, Søren Espersen oqarpoq.
Dansk Folkeparti-p siulittaasuata tullia qinigaaffiit siuliini ataqqinaataasumik ilaasortaaffimmi udenrigspolitisk nævn-imi siulittaasup tullerisarsimavaa, IA-meersorlu Aaja Chemnitz Larsen tassani aamma ilaasortanngorpoq. Tassani ilaatigut Thulemut tunngasoq matoqqasumik oqaluuserineqassaaq.
Siumumit folketingimi ilaasortaq Aleqa Hammond Kalaallit Nunaannut Ataatsimiititaliami siulittaasup tullinngussaaq udenigsudvalg-imilu ammasumi ilaasortaalluni.