Kalaallit Nunaannut ataatsimiititaliaq
Kalaallit Nunaannut Ataatsimiititaliami siulittaasoq talerperlerneersuuvoq
Aleqa Hammond tupigusuppoq oqarlunilu: – Folketingimi apeqqutit nunatsinnut tunngasut suleqatigiissutiginissaat ajornakusussagunaqaaq
Folketingimut qinersinermi partii nunatsinni taaguunneqarnerpaasimasoq Kalaallit Nunaannut Ataatsimiititaliami siulittaasunngortitsisaraluarpoq. Qinigaaffimmi kingullermi Sara Olsvig tassani siulittaasuuvoq, taannalu IA-mi siulittaasunngormat ataatsimiititaliami tassani siulittaasuuffik kingoraartaata Johan Lund Olsenip tiguvaa.
Maannali qinigassanngorteqatigiinni, tassaasuni partiit illua'tungiliuttut ilaasortallu atlantikup avannaaneersut, ataatsimiinneranni Aleqa Hammondip paasisimavaa talerperliit amerlanerussuteqarnertik atorlugu aalajangersimasut Folketingip Kalaallit Nunaannut Ataatsimiititaliaani kina siulittaasuussanersoq.
Taannalu tusagassiorfinnut nalunaarutikkut aperivoq: Talerperliit Kalaallit Nunaannut Ataatsimiititaliaq sumut atorniarpaat?
Tusagassiorfinnut nalunaarummi allassimavoq siulittaasuuffik taanna siullermeersumik tunniunneqarsimasoq gruppimut kalaallinik ilaasortaqanngitsumut, taamaattumillu kalaallip siulittaasuunissaanik nammineq aalajangiisinnaanngitsumut.
– Nutaaliaq tamanna eqqumiitsuuvoq, talerperliit Folketingip Kalaallit Nunaannut Ataatsimiititaliaa atornialersimassavaat, tusagassiorfinnut nalunaarut naapertorlugu Aleqa Hammond oqarpoq.
– Illu'atungiliuttut partiivisa kattuffianni ullumilkkut kimilluunniit nassuiaaffigineqarsinnaanngilanga sooq ataatsimiititaliami tassanerpiaq pissaaneq tigummerusunneraat. Ajornerpaassappat ersissutigisinnaavarput Dansk Folkeparti ataatsimiititaliami siulittaasunngortitsissasoq, tamannalu Folketingimi nunatsinnut tunngasunik suleqatigiinnissamut isumalluarnanngeqaaq. Aamma takorloorsinnaavarput talerperliit atorfik taanna neqeroorutigigaat, qineqqusaarnermi talerperleqatiminnut namminerminnik tapersersuisimasunut. Taamaasilluni ataatsimiititaliaq Dansk Folkeparti-p piumasaa malillugu sulissaaq. Qanorluunniilli ikkaluarpat nuannissaluarpoq erniinnaq tusassallugu talerperliit nutaamik iliorneq tamanna sumut atorniarneraat, Aleqa Hammond oqarpoq.