nersorneqarneq
Kalaallit Nunaannit nipitittagaq kusanarnerpaatut toqqarneqartoq
Tunup avannaani nunami allanngutsaalisami umimmak panneq kusanaqisumik assitaralugu nipitittagaq Tele-Postimeersoq nunani tamalaani nersorniarneqarpoq
Nipitittagaq umimmattalik Tunumi eqqissisimatitamiittoq nunat tamalaat nipitittakkamik unammisinneqarneranni kusanarnerpaatut toqqarneqarpoq.
Europami allakkeriviit ataatsimoorfiata Sepac-ip, Small European Postal Administration Cooperations-ip, Tele-Postillu ilaasortaaffigisaata, taasisitsilluni unammisitsinermik aaqqissuussinerani nunarsuarmit tamarmit frimærkinik katersisartut frimærki nunatsinneersoq 2013-imi Sepac-frimærkiatut toqqarpaat. Sepac-frimærkit aqqaneq-marluk toqqagassanngortinneqarsimapput.
Assimik assiliisuuvoq biolog Lars Holst Hansen, taanna Tunup avannaani Zackenberg Forskningsstation-imi sulisuuvoq. Asseq qanoq ilillugu iluatsissimanerlugu ima oqaluttuarpoq:
- Nunarsuarmi nunami allanngutsaalisat annersaanni sivisuumik sulilluni najugaqarlunilu pinngortitamut uumasuinullu qanillinanngitsuunngilaq. Uumasut ataasiakkaat periaasaat ilikkarnartarput, uumasullumi aamma uatsinnik sungiussisinnaasarput. Umimmammik pannermik assilisaq fotofælde-tut taaneqartartumik assilisaavoq, uangalu uumasup assiliiviulluunniit eqqaaniinngilanga assiliinerup nalaani. Junimi maluginiarpakka umimmaat marlussuit taserannguami naanernut issigissunut uteqqiasut.
Nunarsuarmi nunami allanngutsaalisat annersaanni sivisuumik sulilluni najugaqarlunilu pinngortitamut uumasuinullu qanillinanngitsuunngilaq. Uumasut ataasiakkaat periaasaat ilikkarnartarput, uumasullumi aamma uatsinnik sungiussisinnaasarput. Umimmammik pannermik assilisaq fotofælde-tut taaneqartartumik assilisaavoq, uangalu uumasup assiliiviulluunniit eqqaaniinngilanga assiliinerup nalaani. Junimi maluginiarpakka umimmaat marlussuit taserannguami naanernut issigissunut uteqqiasut.
Tele-Postimit nuannaarutigineqarpoq
Nipitittakkanut pisortap Allan Pertti Frandsenip nersuiniarneq assut nuannaarutigaa:
- Nipitittakkanik katersisartut frimærkiliatsinnik toqqaasimanerat Tele-Postimi tulluusimaarutigaarput. Frimærkinik katersisartunit misilittakkatta paasitippaatigut uumasunik nunatsinneersunik assilisat assut nuannarineqartartut, nunarsuarmilu tamarmi katersisartut akornanni assut pilerigineqartartut.