Kalaallit Nunaanni politiiuneq sakkortuvoq

Sakkortuumik peqqarniisertarnerit amerlanerisa poliitit tunuarniuteqartarnerannut pissutaaqataasinnaavoq. Kalaallit Nunaannilu Politiinit tamanna immikkut iliuuseqarfigineqarsimavoq.

Christiansborgimi politimesteri, Bjørn Tegner Bayi, tusarniaaffigineqartoq

Toqutsinerit, nakuusertarnerit, meeqqanut kinguaassiutitgut innarliisarnerit imminullu toquttarnerit. Tamakkuupput Nunatsinni politiit ulluinnarni suliassaasa ilaat.

Peqqarniisertarnerit politimesterip, Bjørn Tegner Bay, naatsorsorsimavai. Naatsorsorneqarsimasullu Danmarkimut sanilliutissagaanni, Nunatsinni politiit arfineq marloriaammik sakkortuumik peqqarniiserniartunik suliaqarnerusartut takutippaa.

Tammakkulu tarnimut sunniuteqartarput.

Politiilli politiiujunnaartarnerannut peqqutit assigiinngissinnaasartut, politimesterip nalilerpaa.

Folketingip eqqartuussiveqarnermut ataatsimiititaliaata Kalaallit Nunaannullu ataatsimiititaliat aaqqissugaanik, inatsiseqarnermut oqartussaaffimmiik tusarniaasoqarnerani, paasinarsivoq.

Politiit sooq atorfimminniik soraarniuteqartarnerannut apeqquteqartuuvoq, folketingimi ilaasortaq Aleqa Hammond.

Ajornartorsiulli iluatsilluartumik Kalaallit Nunaanni Politiit iliuuseqarfigisimavaat.

- Kingunerlutitisarnerup immikkut iliuuseqarfigineqarneratigut, politiit tunuarniuteqartartut affaannanngortinnikuuagut, Bjørn Tegner Bay oqarpoq.

Politiillu oqaloqatigisarnerisigut aamma paasinarsisimavoq politeeqarfinni mikinerusuni, sulianut atatillugu sunnertittarnerit aamma takussaasut, Bjørn Tegner Bay tikkuaavoq.

Illoqarfimmi ataasiinnaalluni politiungaanni sulinngiffeqarneq ajornakusoortarpoq.

Powered by Labrador CMS