Peqqissaasut
Kalaallit Nunaanni Peqqissaasut ileqqorissaarnermut siunnersuisoqatigiivi siulliit
Nunatsinni peqqissaasut kattuffia, Peqqissaasut Kattuffiat, qaammatip ingerlanerani ataasimeersuarmat, Kalaallit Nunaanni Peqqissaasut ileqqorissaarnermut siunnersuisoqatigiit pilersinneqarput
Kalaallit Nunaanni Peqqissaasut ileqqorissaarnermut siunnersuisoqatigiinni Inuuti Fleischer siulittaasunngorpoq.
Kalaallit Nunaanni Peqqissaasut ileqqorissaarnermut siunnersuisoqatigiit peqqissaasut kattuffia 2. november ataatsimeersuarnerani pilersinneqarpoq, siunnersuisoqatigiinnilu arfinillit ilaasortaassapput.
- Siunnersuisoqatigiit peqqissaanermi ileqqorissaarnermut atatillugu ajornartorsiutinik ersersitsinissamut, ilaasortanik akunnattoorfeqartutut misigisunik tapersersuinissamut ileqqorissaarnissamullu maleruagassanik inerisaanissamut tunngatillugu sulianik aallartitsinissartik qilanaarat. Siunnersuisoqatigiit taamaaliornermikkut napparsimasunut ataasiakkaanut peqqissaanerup pitsaassusaa qaffatsissavaat, peqqissaasut ileqqorissaarnermut siunnersuisoqatigiivi tusagassiuutinut nalunaarummi allapput.
Peqqinnissakkut sullissisut sulinerminni akunnattoorfinnik ajornakusoortunik naapitsigajupput, akunattoorfiillu ilarpassui ileqqorissaarnermuttaaq tunngassuteqarput, erseqqissaassutigineqarpoq.
- Peqqissaasoq ajornakusoortunik toqqaasussaasarpoq apeqqutinilu pingaarutilinni kisimiikkajulluni tamanna peqqissaasuni ataasiakkaani nalorninermik toqqissisimannginnermillu pilersitsisarpoq. Siunnersuisoqatigiit suliassaannut assigiinngitsorpassuit ilaasinnaapput, ukiullu siulliup ingerlanerani Kalaallit Nunaanni peqqissaasut ileqqorissaarnissamut maleruagassaasa inerisarneqarnissaat qitiutinneqassaaq, tusagassiuutinut nalunaarummi oqaatigineqarpoq.
Siunnersuisoqatigiinni ilaasortat: Kristine Fink, Pauline Olesen, Inuuti Fleischer (siulittaasoq), Rikke Bruun de Neergaard (siulittaasup tullia), Lili Holm Kleist, Kristina Lundgaard Jeppesen.