ataatsimeersuarneq
Kalaallit Nunaanni nutartigassarujussuit
Qaammammi tullermi ataatsimeersuarnissaq ´Issittumi Sanaartoriaaseq´Arctic Business Networkip suliniutigalugulu ingerlanniarpaa
Nunatsinni sanaartornermik ingerlatsiviit, ukiumut 1 milliardingajaat nalingannik sanaartortartut, nutarterinissamik unammilligassarujussuaqarput.
Sanaartornermik ingerlatsiviit nunatsinni sila mersernarsinnaasoq kisiat unammilligassarinngilaat, aammattaarli silap pissusiata allanngoriartornera unammilligassaralugu. Tamanna tunuliaqutaavoq Arctic Business Networkip ataatsimeersuarnissmik suliniutaanut ´Issittumi Sanaartoriaaseq´, taannalu februaarip 4-aanni Aalborgimi ingerlanneqassaaq.
Inissiat aserfallassimaqisut
– Kalaallit Nunaanni inissialiat affai ima aserfallassimatigaat ukiuni aggersuni nutarterinissaq 6 aamma 12 milliarder koruunit akornanni akeqassalluni, lektor Tove Lading, Artek/DTU Byg-imeersoq oqarpoq.
Taanna ataatsimeersuarnermi pingaarnertut oqalugiassaaq, ataatsimeersuarnerlu ineqarnermut attaveqarnermullu Naalakkersuisumit Knud Kristiansenimit (A) ammarneqassaaq.
Tove Ladingip saniatigut Danmarkimi Kalaallillu Nunaanni sanaartornermik qitiusumik inissisimasut arlallit peqataassapput, tamakkualu Issittumi atortunik toqqaasarneq sanaartornerillu ingerlanneqartarnerat oqaluttuarissavaat.
Sanaartorneq attaveqarnerlu
Tamatuma saniaitgut Ernst Jan de Place Hansen, Statens Byggeforskningsinstitutimeersoq Aalborg Universitetimeersorlu nunatsinni sanaartornermi malittarisassanngortussat paasissutissiissutigissavai.
– Arctic Business Networkili isumaqarpoq Issittumi sanaartorneq attaveqarnerlu ingerlanneqartariaqartut pitsaassuseq, nunarsuarmi sumiiffinni allani atorneqartoq malillugu, akit sanilliunneqarsinnaasut atorlugit, aammalu pinngortitami sunnertiasumi avatangiisit qulakkeerneqarnissaat isumagalugu, pisortaq Poul Hededal, Rambøll, ataatsimeersuarnissaq sioqqullugu oqarpoq, taannalu Arctic Business Networkimi siulittaasuuvoq.